مطفي هامور 👌🏻 سنة و ١٠ شهور!! من انطلاقة قرقعة! ٥١٣ وصفة!! نزلت في قرقعة! و ليما الحين ما نزلت مرقة هامور!!! شلون!! شلون كل هالوقت مر على قرقعة! و ما نزلت وصفة هامور!! سألت نفسي هالسؤال و أنا أشوفه منسدح جدامي في السوبرماركت! 😅 شنو اللي صار؟ اللي صار إني كنت في مركز سلطان أشتري احتياجات البيت كالعادة… و قاصد قسم اللحوم الحمراء المبردة! و في طريقي! مريت على قسم الأسماك مرور اللي مو هامه ولا يبي منه شي!! و إذا بصوت الثلج المجروش يستفزني!! التفت و إذا بالموظف يشيل من هالثلج و ينزله على المعرس اللي توه واصل و منسدح!! سألت الموظف: هذا هامور مال وين؟ فقال: كويتي و لسة واصل! هنيييي!! بهاللحظة تذكرت و تساءلت!! أنا شلون ليما الحين ما نزلت وصفة هامور!! رأساً… تغيرت الخطط! و تحولت الاهتمامات… و قلت للعامل: شيله من على الثلج و قص راسه و اقسمه بالنص، و قطّع الباقي ٣ أجزاء😁✌🏻 و صارت النية مرقة الهامور😍 بس مو أي مرقة لا!! 😁 أبيها مطفي ✌🏻 لازم مطفي ✌🏻 و كلمة مطفي بالعامية مأخوذة من طفو، أي أن السمكة تطفو و باينة على سطح المرقة بسبب قلة كميتها و كثافة قوامها… أجريت اتصال واحد لشخص أعرف أنه راح يقدر هالأكلة القديمة… قلت له: محمر و مطفي هامور (شرايك؟) قال و بصوته العالي و المزعج: ونعوووووومك 🤩 متى يخلص!! فقلت له! ساعة و حياك، و الباب تعرف شلون تبطله 😅😅 و طاف من الساعة ١٠ دقايق و إلا بالأخ في وصط البيت😅😅 كانت واحدة من ألذ الأكلات اللي طبقتها بصراحة👌🏻 و أنصحكم فيها… و الحين نقول… 🛑عناصر الوصفة: - سمكة هامور (متبل ببهار سمك) - بصل مفروم - كزبر مفروم - شبنت مفروم - صلصة طماط - راس ثوم - لومي صحاري - ثوم مدقوق - زنجبيل مدقوق - صبار أو صلصة التمر الهندي - البهارات الناعمة (لومي أسود / بابريكا / بهار سمك / كاري / كركم / رشة دارسين / رشة هيل / كزبرة /كمون / ملح) و طبعا على راس الهامور راح بطريجه للي يحبه 😁😍 🔺و الحين السؤال… لما نقول مطفي هامور!! شنو الطبق اللي لازم يكون جانبي معاه؟ شنو تسوون في بيتكم؟ أنا راح أقولكم باجر😁 و بس😁❤️ سلامتكم و تعيشون 😍 📈تقييمي: ١٠ من ١٠ ولااااا غلطة👌🏻 الكميات : ميزان العين و هوى النفس 😉 - @garga3h