King Mswati III Mswati lomnyama kulabalutfuli Mgobo kampondo longangen’ etigujini Longen’ emagabelwen’ etinyatsi. Nkhonyane yeMbube yeNgwenyama Leyats’ ivela yab’ imil’ ematinyo Yabhodli’ eLudzidzini kwalavuk’ imililo Gcamu-gcamu Mntfwana! Gcamu-Gcamu emalangabi! Emalangab’ eliLanga lemaSwati. Wota wota yentsatsakusa! Msebe lowakhany’ ekuseni Wabonwa nguDzeliwe kaLobamba Wabonwa yiNdlovukaz’ esigodlweni Esuk’ emasotj’ ashay’ indesheni Wawahlola Mswati wawahalalisela Etsaba njengetintsaba teMdzimba Ingan’ ats’ uyawabingelela Kantsi uyawalola Mntfwana uyawalolonga Nangu Mswati ingabe nimbonile Wehlise lunyazi lwanyazima Lwatihashula timbiba engungwini Letabhasha imbasha yemuka neLuntsantsama Tasha tabhonca emadlebe Letinye takhosela emaweni. Mntfwana ulapha nje kukuphi eNgilandi? Ngikubone wehla ngebhanoyi kuMatsapha Sewuconsa sewungungcocwane. Ngcocwane muni yena loyi Lomibalabala yemushi wenkosazana Lophuma etimphophomeni temifula Lodlalisela esicongweni setintsaba? Mswati bagovuka nawe eNtfonjeni Ngibevile bakots’ etihoncweni Etihoncweni taboJah’el’dala naboMancibane Batsi yebo siyitsets’ iNgwenyama Lamuhla ibuyel’ eNdlunkhulu kaHhohho. Mboneni Mswati yehheni bo uyiNqaba Ngobe ungene ladvuma landindizela Kwesuka kwahlabela umbayimbayi Enkhundleni kaSomhlolo umbayimbayi Mbayimbayi nang’ umbayimbayi Ngwenyama lenjani yona leyi? Leyabhodla kwasabela Regeni eMelika INyuropa yona yahlahl’ emehlwana EmaSwat’ atsi: “Halala Nqaba kaNqofula!” Mswati bakhuluma batsini ingani mine angibeva? Batsi umfula uyabotja ingani uyangenisa Ungenise ngasemitini bayaluka Batsi inkhosi iseLusaseni ingani iseLudzidzini Kwatsi kunhhinhha kwafitsibala Waphumel’ ebaleni Kaunda wemaZambiya Waphumel’ ebaleni Mushweshwe webeSutfu Waphumel’ ebaleni Zwelithini wemaZulu Kwahlangana ingwe nengwenyama Batsi sibambe Mswati sibambane Ngobe nankh’ emazinyani’ eSilo alambile Afun’ umondli wezintandane. Wena lowancamisa titjudeni taseMvasi Taze tashona phasi takhokhotela Tatsi Uyimvula! Uyimvul’ enethayo Bayethe! ❤️🙌🏻🔥 #Dlamini #eswatinitiktok #eswatinitiktok🇸🇿 #eswatini #mswati #kingmswati - @dlaminiroyalhouse