شنو هاي المصطلحات اللي تسمعها من تريد تشتري لابتوب او حاسبة شنو تحتاج تعرف : 1. المعالج (CPU): • يعتبر العقل اللي يتعامل وية الاشياء اللي تصير بالحاسبة ويجي اصدار و جيل كلما زاد الاصدار و الجيل كان افضل وبداخله اكو انوية ( نواة كأنه فصوص الدماغ) كلما كان اكو انوية اكثر زادت قدرة المعالج على معالجة و التعامل مع بيانات اكثر وتالي ينقلها لكل اجزاء الجهاز اشهر نوع انتل وبعد رايزن بس الانتل اشهر و افضل 2. الذاكرة العشوائية (RAM): • مثل غرفة استقبال البيوت هاي تاخذ البيانات مثل الضيوف مؤقتاً تسويلهم تعداد وشنو يحتاجون و من هذا الفهم ينقل الطلبات للمعالج حتى يعالج الموقف وكلما كان الرام اكثر نستقبل ضيوف اكثر لكن اذا كان رام صغير صعب تستقبل الكل وحتى لو الرام جبير بس المعالج تعبان ماكو فايدة لازم اكو تناسق . 3. التخزين (الهارد): • خزن وحفظ الملفات والبرامج يعني ذاكرة الخزن يجي نوعين HDD رخيص بس بطيء بالخزن وحجمه اكبر ‏SSD غالي بس سريع جداً خصوصاً اذا عندك رام ومعالج عالي 4. كرت الشاشة او (بطاقة الرسوميات) (GPU): هاي تستخدم للتعامل مع الاشياء اللي بيها تفاصيل صورية وتصاميم مثلاً العاب او فديوات دقة عالية او مونتاج يعني شغلته التعامل مع الاشياء اللي بيها تفاصيل صورية دقيقة و كلما كان سعة اكبر كان افضل ويجي نوعين اما منفصل (خارجي) او من ضمن الجهاز (داخلي) الخارجي افضل خصوصا اذا كنت تبحث عن جهاز مخصص للالعاب او تريد تزيد السعة مستقبلاً 5. الشاشة: • هاي معروفة بس تحتاج تاخذ شي يكافئ استخدامك للجهاز مثلا تستخدمه فقط دراسة او مكتب او تريد خاص للالعاب او المونتاج والتصميم هنا لازم تاخذ نوع شاشة بالوان و دقة تنطي استخدامك استحقاقه و تكون صحيحة مقارنة ببقية المواصفات . 6. الوزن والتصميم: • هذا شي يرجع لذوقك و امكانيتك المادية 7. نظام التشغيل: • اشهر نظامين هم macOS لأجهزة Apple، و Windows تقريباً لكل المصنعين البقية الماك : ينطيك حماية قوية و شغل احترافي للبرمجة و المونتاج و التصميم وفقير جدًا بالبرامج البقية و الالعاب تقريبا صفر وندوز : حماية ضعيفة و تكدر تشتغل اي شي يعجبك بلاش لأن كلشي تكدر تنزله (مىسىروق) مفيد جداً بالبرمجة وكل البرامج تقريبا و احترافي جداً بالالعاب لكن بالمونتاج يعتبر اقل قدرات من الماك #تقنية #خليل_الشريف #اكسبلورexplore #لابتوب - @khalil.alsharif