#بإسم الحاضر والمستقبل ست الدار بت أحمد قالت : ليك يا الزين ود حامد شوقنا أما بعد : المبعوتة المنك وصلت ورُح فكيت الطلب الفوقنا باقي الدين يا الزين خلصتو قدر الفاضل مصروف راشد والتومات والجايات من جاي ، لا جاي زي ما قُتلك قبال ده شهر إتنين ح نطهر راشد شهر إتنين المدرسة تجز الله يبعد العارضي تجينا وراشد حالف ما يطهر إلا أبوهو وعمتو تحضر وإلا يجيبوا الغنايين شان الشوق بت سِرنا ترقص قلنا نجيب المداحين طنطن .. أنا جاي من الحِّج؟ وعارف راشد لما يطنطن كل الدنيا الفيي تطنطن غايتو بشر ، بس ربـو يهون ما كلمتك بالتومات أول البارح جنـي يرطنِن قالن نحن الخواجات بسم الله ، مرق حصلت لقيتلك جعفر زارد البيت بالخواجات يبقى حِداشر وخواجية ناس البلد الكسروا عليهن صدوا يقلبوا في إيديهم عدمانين من إسم حكيم ، ولا خبيراً للمشروع ، علماء آثار فضلت فيها آثار ما خموها الجونا قبلكن شن خلولنا بلا حجار الله يصرف الخواجات بينات جعفر والمحجوب ، والمحجوب والخواجات طقت حِجي ، العمدة طفاها باقي الناس الجات للفِرجي قنَّبوا قيّلوا شبعوا لحوم والخواجة يصور ساكت ست خرفن وتيس ما كفن المعدوم أشكال وألوان أي خدار في اليوم داك في كملن رف كمين دكان أول كفو الخواجات بعدو العمدة وصمد الساقي ناس المجلس والمشروع وبعدو الطلبة وباقي الناس حتى الشفع والحروم ستة خرفن وتيس إنصفن ستة خرفن وتيس إنصفن ستة خرفن في فد يوم جات من صالح بت كلتوم تسكت تخبز طول اليوم لامن حرقت الدولاب قنبت المسكينة تدعي الله يصرف الخواجات غاية الليلة السقا يشولِت واطات الله دي سَت رشاها ما في غنيوتاً ما غناها ما في مدحتاً ما سواها حمارو صبح لحق أمات طه سب الدين والأمريكان جِنس بدع زولك ده يحير يلبس توب في توب ويغير توب الفلهمة تلقي يجرجر وتوب الدين شفاف وقصير عند الجد كان أده ينقنق عند الفارغة يشيل ويبعزق إنذكرت كلامك ليا إنو في ناس لاعبين بالدين وناس لاعبابا الأمريكان الله يصرف الأمريكان الله يصرف الصرفيكان ما خلوني نشدتك منك كيفن حالك والخرطوم؟ كيف المصنع والعمال حالهم لسع نفس الحال ؟ وما رقوك سووك باشكاتب ؟ يورينا الله زيادة الراتب كيف الناس والحالة عموم ؟ والعزابة الكحيانين سيد البيت عل ما زكاكم ! لسع تقعو تقومو براكم ؟ قلبي معاكم ربي يخدر عود ضرعاتكم بالي معاك يا الزين ود حامد بالي هناك والشوق الشوق خلً شدير الجوف محروق راجي مطيرة الزين ود حامد إحنا نُصاحاً زي واطاتنا إحنا نُصاح إلا القراص والتجار والحاصل البحصل كل صباح شتلاتك قبضن الحملان كِبرن بالحيل العضمين الروكة إنزرعن الحوضين النال إنقلعن أوعك تشفق من تالانا ولا نبقالك مشغولية زيك واحد مستورين وما ناسين المسؤولية هي يا الزين زغرد بت ام زين جابتلها بت ستة أولاد حتان البت المحجوب ينشد من خبرك شافعو محسب من يومين التومات طيبات ونصاح إلا هُاش بالحيل آ الزين راشد كرر .. شهر إتنين كان ما جيت أنا ما بطهر الله يبعد العارضي تعال كان فد دور يدوك يا تعال كان بالخصم إن شاء الله تعال وما تتوصى وداعة الله أوعى البشغل والعربات والحاكومة السمّها فاير أم أولادك ست الدار بت أحمد جابر - @aboahmed9087