طيب عشان فيه ناس كتير بتستهون بالموضوع، تعالو نتكلم عن السعار أو داء الكلب أولاً: إيه هو السعار؟ دا مرض فيروسي بينتقل عن طريق لعاب الكلب المصاب، ومش لازم الكلب بس أي حيوان ثديي ممكن ينقل المرض وخصوصا الحيوانات اللي في الشارع، إحنا سميناه داء الكلب لإن أغلب الحالات بيكون الكلب سببها. الفيروس بيدخل عن طريق جرح ومابيعرفش يخترق الجلد السليم، فالكلب بيعض أو يخربش وبعد كدا يحط اللعاب على الجرح. طيب لو أنا متعور أصلا من مصدر تاني والكلب لعق مكان الجرح؟! لو الكلب مصاب هتتصاب. خلينا متفقين في الأول إن الفيروس لو وصل المخ أو العصب فدا مالهوش علاج وللأسف الإنسان 100% هيموت، وكل ما كان مكان العضة أبعد عن المخ كل ما كان قدامك وقت تلحق نفسك قبل مايوصل المخ، يعني لو في الرجل فدا قدامه وقت شوية، لو في الإيد فدا هيوصل أسرع، لو في الرقبة بقا فالحيوان داخل عارف هدفه وبيكون شعاره في الحالة دي: أنا مش هموت لوحدي ماهو يا نعيش عيشة فل يا نموت إحنا الكل. ثانيا: أعمل إيه لو اتعرضت لعضة حيوان؟ لو تعرف تحبس الحيوان دا وتخليه عندك فدا أفضل وهقولك السبب بعد شوية. الأول هتجري بسرعة تغسل مكان الجرح كويس جدا بماية جارية وصابون لمدة ماتقلش عن ربع ساعة، وبعد كدا تعقمه بمطهر قوي. وفي خلال 24 ساعة بتروح على أقرب مستشفى وتاخد المصل وبكدا هتمنع وصول الفيروس للمخ وتكون فرصتك للنجاه كبيرة. (المصل بيتاخد كذا مرة على فترات) والمصل دا بيتاخد حتى لو متعرفش الحيوان مصاب ولا لا لإن السعار مالهوش تشخيص زي ما مالوش علاج وبيتعرف بعد مالشخص يموت. عارف الكلب اللي حبسناه من شوية هنقدمله أكل ونراقبه في حال ظهرت عليه أعراض أو مات هنكمل الجرعات والعلاج، طيب لو حبسته فترة كبيرة وماظهرش عليه حاجة؟ في الحالة دي الحمد لله أنت مش مصاب وتقدر توقف علاج. ثالثا بقى: إيه هي الأعراض اللي بتظهر على الكلب؟! هلع وخوف شديد من الماية(في حالة الكلب والإنسان) سيلان اللعاب(الكلب والإنسان) وأي تصرفات غريبة من الكلب. طيب الإنسان؟! حمى وسخونية، غثيان وقيئ، صداع، تشنجات، ضيق في التنفس، فوبيا لما يشوف ماية قدامه ومش قادر يشرب، توتر وخوف شديد، انزعاج من الهوا وأي صوت، وممكن شلل. ناخد بالنا إن فترة حضانة الفيروس كبيرة (من 20 ل 90 يوم) وممكن أكتر في حالات قليلة، يعني ممكن تتصاب ومايظهرش عليك أعراض إلا لما يوصل المخ، وف كل الحالات لازم مصل لإن زي ماقولت مالوش تشخيص والكلام دا بينطق على كل الحيوانات. الموضوع خطير وفيه دراسات اتعملت بتقول إن أكتر من59 ألف حالة بتموت سنويا بداء السعار. ناخد بالنا ونوعي غيرنا ضروري وخصوصا الأطفال والناس اللي بتحب تلعب مع أي قطة أو كلب في الشارع. ملحوظة: الفار لو مصاب وعض إنسان هيعديه والله عشان بشوف ناس بتتعض من فار وتقعد وتسكت.#داء_الكلب #عضة #عضة_كلب_مسعور🐕 #elhefnawy_clinic #السعار # #rabies #rabiesawareness #rabiesinfected #rabies_vaccine🐈 #الكلب #كلاب #كلاب_مسعوره #الكلاب #الكلاب_الضاله - @elhefnawy_stories