Қоғамдағы көп әйел еркек біткеннің күзетшісіне айналғандай. Еркекті ештеңе ұстамайды. Тәтті тамақ, жылы төсек, таза үй, баланың күлкісі деген де еркекті ұстамайды. Осыны алдыма келген қанша әйелге түсіндірудің өзі өте қиын. Тіпті, сапалы жыныстық қарым-қатынас та еркекті ұстап тұра алмайды. Сұлу сымбат та, сыланған ажар да, қыздай қынап та ұстамайды. Тым көп бақылау – дерт. Өмір – бақылауда ұстау үшін тым шексіз мұхит. Біз оған тереңдеген сайын тұншығамыз. Ұнауға тырысқан сайын ұнамсыз боламыз. Бақылаған сайын қадіріміз жоғалады. Еркекті ессіздіктен ұстап қалатын - жүрегіндегі ИМАН! Мінезіндегі, болмысындағы, өміріндегі ИМАН емес, жүрегіндегі ИМАН. Мейлі, он бала тусаң да, ажарың кетсе де, сымбатың кетсе де сырыңа қанық, сезіміңе адал адамдар болады. Олар үшін адал жар ұғымының мәні терең. Олар тұзы аз, дәмі жоқ болса да ошағына асығып тұрады. Олар тапқан бар ризығын бала-шағасына береді. Кейде қарап отырып, бас шайқайсың. Небір-небір азамат еркектер ақ жағасы кірлеп, асқазаны алты ай ас көрмесе де үйіне асығып тұрады. Сыртқы селтеңі де, жылтың еткен көзі де жоқ. Демек, адам баласы отбасы деген отанның киесін, қасиетін түсінуі шарт. Отбасы құндылығын бағалауы шарт. Жанұяның жаратқан алдындағы маңызын білгені шарт. Онсыз еркекті ештеңе ұстамайды. Еркекті ақтай беретін, жақтай беретін мына заманда әлі талай қыз азаматты уыста ұстаймын деп небір сорақыны үйренеді. Түптеп келгенде, ештеңе үйренбей, ештеңеге асықпай, еш қиындық көрмей, ешкімге мұқтаж болмай өмір сүруге жаралған жаратылыс емеспіз бе?! Ендеше кеткен еркек үшін де жыламаңыз! Өзіңізді жазғырмаңыз. Өмір жалғасады. Барлық әйел бір күні болмаса бір күні түсінетін бір қағида бар. Еркек үшін деп жасағанның соңы - нәтижесіз. Еңбек ақталмайды. Өзіңнен мін іздей бересің! Түн құшағында өзіңді жазғырудан да шаршайсың! Соңында, кеудеңде үміт оты өшеді. Ең бастысы, әр әйел ішіндегі отын өшірмесе екен. Басынан нендей жағдай өтсе де, ішіндегі отына отын беріп отырса екен. Өмірге деген ыстық отын сеепсіз лаулатса екен. Әйтпесе, көп замандастың іші бықсып, түтіндеп, соңында сөніп қап жатыр. Өз отыңды өшіріп алма, замандас! - @zhutayeva