@r00bl3: qaybta 3aad Maraykanka oo ka daalay xakamaynta iyo xasalinta qaskii dalka ka socday oo bartamaha sagaashameeyadii isaga baxay ayaa qaatay siyaasadda ah hareeraynta Soomaaliya iyo inuu qaskeeda halkeeda ku hayo oo uusan ku fidin dalalka dariska iyo geeska afrika. Balse wixii ka dambeeyay 2003-dii ayaa uu dareemay khatar dhaafsiisan reerihii sidii bisadda iyo jiirka isku eryanayay. Oo maxay ahayd khatartu?! Ceeryaamo iyo cimilo jihaad baa gunta kaymaha Soonaaliya ka soo bidhaamayo. Waxaana Soomaaliya ku dhuumanayo rag uu ku raad joogay oo ahaa raggii ka qarxiyay safaaradihii Maraykanka ee Kiinya iyo Tansaaniya. Waxaad moodaa inuu mawduuca inaga baahay, aynu Afgaani kaliya ku soo koobno. Sidii la isku huursanaa Maxkamadihii ayaa la kala baxay goortii uu Sheekh Shariif qoriga dhigay oo uu wadahadal ogolaaday. Afgaani iyo Godane iyo rag kale ayaana ku dhawaaqay urur la magacbaxay Alshabaab (AS). Haddaba sida uu ururkii isku watay oo wacdaro uga dhigayay masraxyada dagaalka oo uu gacanta ku dhigay badi magaalooyinka iyo miyiga Koonfurta Soomaaliya ayuun baa 2010-kii bela dhacday. Axmed Godane oo ahaa Amiirka AS ayaa ururkii waxa uu galiyay dagaal uu si daran ugu dhiigbaxay. Waa dagaalkii ay ugu magacdareen “Nihaayatul Muctadiin”. Walow khilaaf hoose uu jiray balse dagaalkani waxa uu bannaanka keenay shuuxshuuxdii jirtay. Muddo yar kadibna waxaa isqabtay Afgaani iyo Godane. Haddaba Ibraahim Afgaani iyo Axmed Godane maxay isku qabteen?! Afgaani kaligii isma ay qaban Godane ee rag badan oo madaxdii iyo asaasayaashii ururka ahaa ayay is maandhaafeen. Waxaana kamid ahaa Mukhtaar Roobow, Cabdixamiid Colhaye, Xasan Daahir Aways, Cumar Maxamed Abuu Ayaan. Sidoo kale, Godane waxa ay isqabteen rag ajaanib ahaa, sida Abuu Mansuur Al-Imriiki, Abuu Subayr Almuhaajir iyo dad badan oo kale. Khilaafka ururku wuxuu si fiican u soo shaacbaxay February 2011-kii, waxa uuna salka ku hayay oo ay raggaas iyo Amiirku isku diiddanayaayeen arrimo awoodeed, istiraatiijiyadeed, caqiideed, farsameed iyo mararka qaarkood kuwo qabiileed. Raggii Godane ay maandhaafeen in badan oo kamid ah waa uu laayay, in kale oo badanne waa uu xirxiray, qaarna way ka carareen ururka. Afgaani waxa uu Godane ku arkay talo maroorsi, inuu gacan bir ah ku maanmulo ururka iyo inuu kaligii go’aan iska gaaro. Tusaale, August 2010-kii waxa uu Godane kaligii gaaray go’aanka dagaalkii aan soo sheegnay ee la magacbaxay Nihaayatul-mucatadiin oo lagu la galayay Dawladdii kumeelgaarka ahayd ee Sheekh Shariif. Cid kale oo uu ka talo galiyay ma uusan jirin. Waxaa la sheegaa in dagaalkaasi uu ururka ku waayay 600 illaa 700 oo dagaalyahan. Waxay se u badnaayeen Raxaweyn. Sababta waxaa lagu sheegay inuu Godane isdareensiiyay in Roobow ay qabiilkiisu ku badan yihiin ururka, sidaa awgeed uu go’aansaday inuu galiyo dagaal lagu dhimayo cududda ciidan ee u badan beesha Raxaweyn. Marnaba ma uusan rabin awood aan isaga ahayn inay ururka ka dhexjirto. Arrintaasi aad bay uga caraysiisay Roobow oo maalin qura ayuu illaa kun wiil furinta dagaal kala baxay, waana laga dareemay arrintaasi masraxa dagaalka. Waxaa kale oo Godane iyo Afgaani isku qabteen jiritaanka ciidamo madax-jabis iyo sirdoon oo u gaar ah Godane. Waa ciidamo ka baxsan kuwii sirdoon ee uu si guud ururka u lahaa. Kuwani waxay si qarsoodi ah uga amar qaadanayeen Godane oo ciddii uu ku amro inay khaarijiyaan su’aal kama aysan soo celinayn. Waxaa la sheegaa dagaalkii Nihaayatul Muctadiin in ciidamadaasi lagu dhex daadiyay furinta uu dagaalka ka socday. Shaqadoodu waxay ahayd inay dhammaystiraan dhaawacyada Mujaahidiinta! Kolka Godane sababta uu sidaa u amray la weydiiyayna waxa uu ku jawaabay inuu ka baqayo in gacanta lagu dhigo iyaga oo dhaawac ah kadibna laga helo sirta mujaahidiinta. FG; ma jirto wax saawira ah, oo laga hayo ibraahin afgaan #fyp #Hadraawi #fypage #foryoupage #fy

cabdiraxman

Open In TikTok:

Region: SO

Saturday 22 June 2024 16:29:45 GMT