كيكة تعديل النفسية ✨ المقادير: الكيك: (انا سويت نص المقدار بطبق ٦ إنش) ٣٠٠ جرام سكر (١ ١/٢ كوب) ٧٥ جرام كاكاو بودرة (٣/٤ كوب) ٢٤٠ جرام دقيق متعدد الاستعمالات (١ ٣/٤ كوب) ٦ جرام بيكنغ باودر (١ ١/٢ ملعقة شاي) ٩ جرام بيكنغ صودا (١ ١/٢ ملعقة شاي) ٦ جرام ملح (١ ملعقة شاي) ١٠٠ جرام بيض (بيضتان) ١ ملعقة شاي فانيلا ٢٢٧ جرام حليب (١ كوب) ١٠٠ جرام زيت نباتي (١/٢ كوب) ٢٢٧ جرام ماء مغلي (١ كوب) ٦ جرام قهوة فورية (نسكافيه) (١ ملعقة طعام) أول شي راح نذوب القهوة بالماي المغلي. الماي المغلي والقهوة غالباً تشوفونهم بوصفات كيك التشوكلت لأنهم يساعدون بتعزيز نكهة الشوكولاتة. نترك الماي على جنب. في وعاء راح نضيف كل المكونات الجافة (الطحين والكاكاو والسكر والبيكنغ باودر والبيكنغ صودا والملح ) ونخلطهم بعد ما اختلطوا نسوي حفرة بالنص ونبدأ نضيف المواد السائلة ما عدا الماي. (الحليب والزيت والبيض و اخر شي الفانيلا). ونبدأ نخلط خفاقة عادية ( تقدرون تستعملون خلاط الكيك بس انا بسويها بيدي لأنها ماتحتاج خفق كثير). بعد مايختلط بيتكون معانا خليط ثقيل الحين نضيف الماء ونخلط بعد ما يتجانس بيصير عندنا الخليط سائل جداً. نصبه بالطبق (وصفة الكيكة هذه ممكن تسوى ب ٣ أطباق قطرها ٨ إنش أو طبقين ٩إنش أو طبق واحد كبير (bundt) أو ممكن أيضاً تتسوى بطبق الكب كيك..) ندخله الفرن على حرارة ٣٥٠ ف ونتركه يخبز ٣٠-٤٠ دقيقة (على حسب نوع الطبق). وراح نعرف اذا خلص اذا سوينا اختبار عود الاسنان ندخله بنص الكيكة واذا طلع نظيف بدون خليط معناته الكيك جهز عندنا. نطلعها ونقلبها وهي حارة على قطعة بلاستيك (نايلون) ونغلفها. ونخليها تبرد (بالثلاجة اسرع) وهي مقلوبة بحيث يصير سطحها متساوي. الجاناش: ٥٠٠ جم شوكولاته ١٢٠ جم حليب (نص كوب) ٨٠ جم زبدة نضيف التشوكلت والحليب ونذوبهم بالمايكروويف ونضيف الزبدة ونحركها إلى ماتذوب معاهم، يمكن تحتاجون تدخلونها المايكرويف على دفعات عشان تتأكدون انه كل شي ذاب. ونغطيها ونخليها تبرد بالثلاجة ساعة - ساعتين إلى مايصير قوامها ثقيل. - @2xyz22