اتهيدينت البداع محفوظ ولد عب للمرحوم قطب زمانه شيخنَ اعل الشيخ ولد اممَ ظهورك ماريناه كيف ظهور ** حد من ليلت استوليت لخلاگ ؤذاك الظهور فيه لذهان اتحور ** يشيخنا اعلي الشيخ كيف البراگ ؤعدت منگع من البركات مايغور ** واحل وازلاگ للظواگ ؤتنفع اصديگ واتظر لعدو معمور ** تازبتك ألا أشهاب فانواگ وانزلت أطار أُلا اخلگ محذور ** واتخلط الخلق أُگامت آراگ ؤفجرت من العلم والخير لبحور ** والحگت المومنين كانت أغراگ والدفگت جاي ابلا تدبور ** هارب من لمبات فابلاگ وعارظ الها بالظحك أُلبخور ** والمفصص بادهن يساگ والخيط والواويش أُفلتور ** وابلحم أجمل وابلبن الناگ واللي منها جاك ينجر مظرور ** إفز ماش أصح من زلاگ مانك حر ،طبعك ماه گشور ** لوذن ما اتحوص والعين ماه شرواگ والتبسام فيه ياسر امن السرور ** والصوت فيه ياسر امن اللباگ أُوتوط بالشور والكم هاك مجرور ** مانك حشاك كيف گومان زعفاگ والباسك ماه الباس حد مظرور ** ؤمشاي ابلا انعايل افتراگ أُولالك غاي بَتْليت اتعود مشكور ** واشگال شاكرك آن إيشير أخلاگ ماگط انفظت من سالف ادهور ** من كمش من لمغنيين احذاگ شارب من شكرك خادم لبحور ** لسنتها جابرالها ميلاگ كلها متگرح أُكله مكرور ** ؤذاك حال لمغنيين لعتاگ وانحاي تطرح اعليك والشور ** يبركو أُبنج أُبرصاگ وابيات الحرب التنشد بالشور ** والشح وامججاي واميلاگ واتعطات يلي لاريت مكدور ** لفام شكرك من هون لنفراگ والحاكم أفَلَّ واظهر وانيور ** وإمرجان أزرات لملاگ أُلگنيب أُلمبيديع وامْ النّور ** ورارَشْ واصبع والعلاگ والحاكمات عِدَلْ اهل محم عاشور ** والْ شارب اعوينت زرگاگ وابهيگت أم لعروگ ؤ واد كامور** واكد تگانت واعلاب واد الناگ والفادواب والفرگان و ادشور ** أُحومات لحرج وأكصور گتاگ والحاكمين أحواشي ذوك لبحور ** واوكار أُتيرس وامساگ أُتميت ألا ابذاك التأمور ** والناس جايتك صاگ اعل صاگ ش جاي إزور أُڜي جاي إدور ** أُشي ماجاك والا أوگوف يزاگ كان ماجاك يللّالُ محرور ** لمجيلك ماگط عاد يُتاگ وان زايرك يخيار شيخ مزيور ** واماسيك دون شي إقيس اطباگ نبغ ياسر امن اتناظير لمور ** وايد وحد ماگط عادت صفاگ ؤفگفاي ياسر من الناس مذكور ** امعول اعلي ؤعادلي اعلاگ وان مقداج وانخاف من لغرور ** ماانگد ندّيلگ امع الديلاگ ؤلان يشيخنا كيف حد مشمور ** والوالدين عايدينلي نقاگ ؤهوم ضعاف أُلا امن البرور ** أنزوگ عنهم فايام حگاگ ؤلاانگد انروغ اطيور ** الطايرين واشگال اطيور انزاگ والخير أبگدو عند ذا الشكور ** ماه حشاه محتاج الدگداگ وان انت تلميديك حگ وانجيك ** مسگد كيف المزراگَ اوصلي ركعات واتجي ماد ايديك ** لَلّه ادور لمور تتلاگ ولل حشاك خلي تلميديك ** إيشير اخلاگ إعود طفاگ #CapCut #موريتانيا #البادية #fyp #explore #viral #tiktokarab #موريتانيا🇲🇷 #لغن_الحساني_الموريتاني🇲🇷 #الشعب_الصيني_ماله_حل😂😂 - @elycheikhch