សម្លៀកបំពាក់ក្នុងពិធីមង្គលការជាអត្តសញ្ញាណនៃប្រទេសជាតិនី១ៗ ប្រទេសថៃក៏ជាប្រទេសដែលមានវប្បធម៌ផូរផង់មួយនៅអាស៊ីអាគ្នេយ៍ផងដែរ។ ថ្វីត្បិតតែពិធីមង្គលការក្នុងប្រពៃណីថៃមិនមានពិធីវែងឆ្ងាយដូចប្រទេសដែលមានអរិយធម៌បុរាណធំៗ ដូចជា ឥណ្ឌា ចិន ឬ ខ្មែរជាដើម។ ក៏ប៉ុន្តែប្រទេសថៃនៅរក្សាប្រពៃណីមង្គលការរបស់ខ្លួនបានរហូតមកដល់សព្វថ្ងៃ។ ពិធីសំខាន់បំផុតក្នុងមង្គលការថៃ គឺពិធីច្រូចទឹកស័ង្ខមង្គល តែដើមឡើយពិធីនេះគឺជាពិធីចម្រើនទឹកព្រះពុទ្ធមន្ត ដែលមានការនិមន្តព្រះសង្ឃមកប្រោះព្រំ តែសម័យក្រោយៗ ពិធីនេះបានប្រែក្លាយជាពិធីច្រូចទឹកស័ង្ខជំនួសវិញ ដែលមានលក្ខណៈស្រដៀងគ្នានិងពិធីរាជាភិសេករបស់ក្សត្រ។ នៅក្នុងពិធីមង្គលការរបស់ប្រជាជនថៃ ក្នុងរយៈកាលសតវត្សទី២០ កន្លងទៅ មិនមានកំណត់ថា មានការស្លៀកពាក់អ្វីអោយច្បាស់លាស់ទេ តែជាទូទៅយើងសង្កេតឃើញថា ស្ត្រីនិយមប្រើប្រាស់អាវប៉ាក់ផ្កា អាវព្រែដៃវែង ឬ អាវដៃខ្លី ហើយស្លៀកសំពត់បត់ក្នុងពិធីមង្គលការរបស់ខ្លួន។ ស្ត្រីខ្លះអាចនិយាយស្លៀករ៉ូបបែបបរទេសតែមានតិចតួច។ ជាទូទៅគេនិយម ប្រកាន់ភ្ជាប់នូវសម្លៀកបំពាក់ប្រពៃណីរបស់ខ្លួនណាស់ គឺ សំពត់បត់និងពាក់អាវដៃវែង។ ចំណែកបុរសវិញ មិនមានជាការកំណត់ដូចគ្នា តែយើងសង្កេតឃើញនិយម ប្រើប្រាស់អាវធំ ឬ អាវរាជការដែលខ្លួនបំរើការងារ។ ត្បិតថា ឈុតព្រះរាជនិយម ដែលក្សត្រីសិរិកិតច្នៃប្រឌិត ដូចជា ឈុតថៃសិវាល័យ ឈុតថៃចក្រីជាដើមនោះ បានបង្កើតឡើងទៅហើយក្តីក៏ប៉ុន្តែ ឈុតនេះមិនទាន់ត្រូវបានផ្សព្វផ្សាយនិងលើកតម្កើងឡើងជាឈុតមង្គលការនោះទេ នៅក្នុងកំឡុងពាក់កណ្ដាលសតវត្សទី២០នេះ។ យើងសង្កេតឃើញមានការប្រើប្រាស់ ឈុតស្បៃច្នៃប្រឌិត តិចតួចក្នុងពិធីមង្គលនៅសតវត្សនេះ។ រហូតមកដល់ចុងសតវត្សទី២០ និងដើមសតវត្សទី២១ ប្រជាប្រិយភាពនៃរាជានិយមថៃមានការកើនឡើង ហើយក៏ជាយុគនៃការផ្សព្វផ្សាយ ការរីកចម្រើននៃវប្បធម៌ថៃ ផងដែរ។ នៅដើមសតវត្សទី២១ ឈុតព្រះរាជនិយមថៃ បានអភិវឌ្ឍន៍ខ្លួនក្លាយទៅជាទីពេញនិយម ជំនួសឈុតមង្គលការថៃដើម ហើយប្រើប្រាស់បន្តមកដល់សព្វថ្ងៃនេះ។ ដោយឡែកឈុតមង្គលការដែលមានលក្ខណៈជាប្រពៃណី បែបប្រជាជនប្រើប្រាស់ក្នុងជីវភាពទូទៅ ក៏ចាប់ផ្តើមរលុបបាត់ចេញពីសង្គមជាតិថៃ ម្តងបន្តិចៗ រហូតគ្មានសេសសល់នៅពេលបច្ចុប្បន្នុំ អ្វីដែលសេសសល់នោះគឺរូបថត អនុស្សាវរីយ៍ ដែលមានតម្លៃមិនអាចកាត់ថ្លៃបាន បង្ហាញពីជីវភាព វប្បធម៌ពិតប្រាកដនៃប្រជាជនថៃ។fp:បុរាណាចារ្យ📍#thaiculture🇹🇭 #thailand #kingofcambodia🇰🇭 #tiktok #fyp - @user468152358