@elycheikhch: فگراشْ انْجُوعْ انْقَيوَان= شِيْخْ انزَايلْهَ واحْلِلْهَ بِيهْ اتشُومْ اللّرْظْ السَّيْحانْ= اِرَحّلْهَ و اِنَزّلْهَ أغْلَظْهَ واَكْبَرْهَ دِيوَانْ= واَرَيَّسْهَ و اَسَطْفَلْهَ وَاَطْرَبْهَ تَوّْ اللّهْوْ اُو كانْ =المَصِيبَه يِتْحَمّلْهَ بِالْخَيلْ الْحرّاتْ اُو لَظْعانْ= وَاصْحابْ الْملْكْ اِيعَدّلْهَ او كانْ اطْرَحْ فَرَاصَ تِشْيَانْ= رَبِّ للنّاس اِحَفّلْهَ او مَسْلَ ذابِحْهَ فِلْكِرْعانْ= فَرْظْ اعْلَ امْباَرك يَوْكَلْهَ وَ اَگْساهَ كانْ النّجْعْ اشْيانْ= وَ اَشْيَنْهَ صَنْعَ وَ اَگْدَلْهَ هَنُّون الِّ عَرْبْ اِنْتَسان= التّالِ مِنهَ وَ اَوّلْهَ مِثْلُ فِيهَ عَمُّ عِثمَانْ= او بگَّ سلْطانْ امْحَافِلْهَ او عَمُّ بَكّارْ اغْليظْ الشّانْ =أكبَرْهَ جَودَ وَ اَعْقَلْهَ اخْليفِتْ گَوْجَايْ الفِرْسانْ =التّانِتْفرْتْ اِحَثْوَلْهَ يَزْضَفْ مُولاهَ فِالْمِسْلانْ =او فَرْصُ فِالرَّوغْ اِحَثَّلْهَ و اِيجِ جانِبْهَ طفْلْ الشان= امْلَغْمَسْ بالدَّمّْ اكْفِلْهَ هَنونْ او كانْ اصْبَحْ غَضْبانْ =عِگْدَ فِي وِجْهُ يَعْمَلْهَ اللّهمّ وِجْهْ الْبرْتانْ= او لا حَدْ اِظَلْ امْگابِلْهَ ما حامِلْ بِيهَ كُونْ افْلانْ =افْلانْ او لاهُ حَامِلْهَ او گُومانْ الْعِلْبَ والتِّمْتانْ= مُحَالْ اتْگيسُ بِاجْهَلْهَ هَيْبِتْ مُولْ الْمُلْكْ السّبْحانْ= اشْيَعْمَلْ حَدّْ امْتِينْ إلْهَ ؟ الشّرْ اعْمَلْ فيهْ البرْهانْ= واعْمالْ الشِّيعَ كمَّلْهَ عادِيهْ ارْمَحْهَ بِالغِزْيانْ =او هذَاك الْعادْ امْجَفّلْهَ فِالدّهْرْ اعْياطْ الْخَوفْ اگْرانْ =شَگّْ الْفِرْگانْ اِشَلْشَلْهَ لينْ اِدَرْبِيهَ فِالْوِدْيانْ= وَللَّ فِاجِّرْفْ اِوَحَّلْهَ تَوْ اِيجِ فَاتْسَعْ مِيتْ اعْنَانْ =هُوّ هُوّ گاعْ اَرْجَلْهَ وَ اَوْلادْ الْفَحْفَاحْ الظّمّانْ =طُولْ الشّرْ اِيلَ دَامْ الْهَ مَا تِذْرِحْ فيهْ او لا تِلْيانْ =او لا گطْ اَلْطامُ مَلَّلْهَ او لا گطْ اتْنَزّهْ فِي لَوطانْ =عَرْبِ كاتِلْتُ و اكْتِلْهَ او لا گَطْ اكْتِلْهَ گاعْ ازْمانْ= ما نِزْلِتْ فِمْنَيْنْ اكْتِلْهَ وِ امْرَگْ هُوَّ بَلُّ حَشْمانْ= او فِادْيارُ سَدّاوْ احْلِلْهَ هِيّ يَومِنْ تَگبَظْ لَظْعَانْ= تِجْبِدْ تِتْمَعْيَرْ فِارْجِلْهَ وِلْ انْجَرْتُ مانَلَّ كانْ =ما يَحظرْ وسْطْ افْزُوعْ الهَ هِيَّ كِيفْ اجْنُودْ السّلطانْ =بِاگْنَاينْهَ و احْمَايِلْهَ واعْمَايمْهَ شَاشْ اَرَوَانْ= و اعْگالْ افْزِرّْ ادْلايِلْهَ او مَحْزَمْتْ امْوَبَّرْ و الْقفْطانْ= و اعْمايمْ رُوصْ امْطافِلْهَ وِ ابْنُودْ اعْلَ عِيدَانْ الزّانْ =جَعْبْ النّصَارَى يَنْعَلهَ وِ اغْفافِيرْ اعْلَ كلّْ الْوَانْ= تِظْوِ فِالشَّمْسْ اِمْدَاوِلهَ طاگِتْهَ بُو فمَّينْ اگْرانْ =وَ اَسْلاحْ افْبَيظْ اتْحَمَّلهَ تسمَعْ كمّْ منْ زاملْ كلْشَان= ادْحِيرُ لَرْظْ اِزَلْزلهَ وِ اتْشُوفْ اصْواگيهَ تِتْبَانْ= تِتْحَاذَ ذيكْ امعَازلهَ بُرَمْظانَينْ او بُرَمْظانْ= بِاگْففْ وِ اگْطاطِ تعْزلهَ او تَسْهَ فِالصّالَ والقفْطانْ =وِ اعمايِمْ رُوصْ امْطافِلْهَ وِ ادْراريعْ الْبُوگْ الشّهْبانْ= تِظوِي فِالشّمْسْ امْكاحِلهَ يعْمِ عَنْهَ عَينْ الْمعْيانْ= او لا صابتْ نِيِّتْ داحِلهَ هذاكْ افْلانْ او ذاكْ افلانْ= اَمّالْ الْعادِي تِحْملهَ تتْغامِسْ فِي رَهْجْ الدّخّانْ =عادَ مَعرُوفَ گاعْ اِلهَ وِ الِّ شَلِّتْ سَعْدُ يشْيانْ= او وَيلْ الْعَاطِ بِاگْفاهْ اِلهَ يَكْرَمْ مِن كَم مِن شَعْناَنْ= بِخْبِيط الدّفْعَ تَعْمَلْهَ وِ اتْحُوصْ الْفارِسْ فِالْمِسْلانْ =فَرْصُ تِهْرِدْ گَدْحْ اكْفِلهَ وَلَّ تَزْضفْ منْ بلّْ اگْرانْ= الْگنْدوزْ او راصْ ارْجِلهَ بِاحْدَجْ گالِبْ مُوسَ نصْرانْ= ذُوكْ اَيّاكْ امْنْ امْقاتلهَ گايِدْهَ هَنُّونْ السّلْطانْ =اعْلَ اَثْرُ مِنْبَجّْ أَوَّلْهَ مِتْكَفَّلْ تَحْتُ منتْ احْصَانْ= خامِرْهَ رَشّْ امْشَاوِلْهَ زَافُوفَه تَغْلبْ مِيتْ اعْنانْ= اعْلَ اَراتِيمْ اِحَمَّلْهَ او مَرَّه تَحْتُ زَامِلْ كَلْشَانْ =خَيْلْ الْمَجْبُودَ يَحْفَلْهَ اِسَنْدِيهَ شَورْ اَغَنّانْ= وَ اكْتنْ تِنْشَلّْ اِوَيتَلْهَ او هذَا ماهْ انُّ دَويْ الْسَانْ =اعْمَلْ ذِي الْحِيلَ و اعْمَلْهَ وِ اعْمَلْهَ فِنْجُوعْ اِوَلانْ =او فِاكْرَاعْ الناگَ سَوَّلْهَ وِ اعْمَلْهَ طاحْ اعلَ فِرْگانْ= اَوْلادْ اعْبَيْدِي سَگبَلْهَ وِ اعْمَلْهَ فِاعْرَبْ بِدّمْيانْ= وِ ابْگورْگولْ لَكْحَلْ سَرْمَلْهَ او جابْ الِّ فِيهَ منْ حَنْحانْ= او لا خَلَّ بَگْرَ وِ اعْجِلْهَ وِ اصْبَرْ صَبْرْ امْتَيتَلْ غَضبَانْ= ماهُ بِالصَّوگْ امْعجَّلْهَ او يِبْغِ عادْ اِسَابِگْ لَظْعانْ =عامِدْهَ وَلَّ غافِلْهَ اِيلَينْ اِگفَّحْهَ لِلِّ بانْ= وِ افْوسْطْ الرَّكْنَ يَوكلْهَ او لُولَ خَوفْ اكلامِ يشْيانْ= فَاعْگابْ الصَّبَّ وَ اوَّلْهَ انْگُولْ انُّ عَرْبِ سلْطانْ= او سَمْيُ لَخْلاگْ اِمَلْمَلْهَ

Ęly Cheikh Çh

Open In TikTok:

Region: MR

Thursday 26 September 2024 21:58:47 GMT