کاتژمێر نزیک دوانزەی شەوە و خەوم زڕاوە. خەتای مێشکمە، مێشکی من قسە دەکات، من هەمیشە پێم وا بوو دەم و زمان قسە دەکەن و مێشک بیر دەکاتەوە.. لە ڕاستیدا شیکردنەوەو لێکۆڵینەوە بایۆلۆجیەکان لە مێژە وا دەڵێن، بەڵام ئێستا پێم وایە، لە پاڵ بیرکردنەوەدا، مێشک قسەش دەکات، بەڕادەیەک، کە ڕۆڵی سرووشتی خۆی، کە بیر کردنەوەیە، لە یاد دەکات و تەنها قسە دەکات. ئەمشەو ٤٥ چرکە لە ناو ئۆتۆمبێل، لە پشت چرای سوری ترافیکەکەوە وەستام، تەنها ٤٥ چرکه بێ کار بووم و مەشغوڵ نەبووم، مێشکم دەستی کرد بە قسە کردن. لەمەوە دەستی پێکرد و ووتی : " دەڵێی دەبڵی ئۆتۆمبێلەکە دەنگی لێ پەیدا بووە و کێشەیەکی هەیە زیکە زیک دەکات؟" دواتر ووتی: " دەی خەتای ئەو هەموو تاسەو چاڵ و چۆڵەی جادەکانە." ئنجا ووتی : " ئەم شەقامە زۆر وێرانە و شارەوانیش هیچ ناکات." دواتر ووتی : " ڕەنگە بودجەیان نەبێت، بەڵام بۆ بودجەیان نیە؟ ڕەنگە بە هۆی قەیرانەوە بێت ." دواتر ووتی: " قەیرانی چی خۆ هێشتا ئەوان مووچەی دووماگ پێشیان دابەش نەکردووە و پارەیەکی زۆر لە باج و سەرانەو داهات یان دەست دەکەوێت، قەیرانی چی؟ بە دڵنیایەوە دەیدزن و گەندەڵن." لە پڕ بە دەنگی هۆڕنی ئۆتۆمبێلەکانی دوامەوە سەرم هەڵبڕی و بینیم ترافیکەکە سەوز بووە. دەبینیت ئەو هەموو قسەیە تەنها لە ٤٥ چرکەدا مێشکم کردی. بەڵام کۆتا دیدار ٤٥ خولەک بەرامبەرت وەستام و دەم و زمانم نەیان توانی بە دێڕێک لێت بپرسن : " بۆ دەڕۆیت؟ یا هەر لە سەرەتاوە بۆ هاتی؟" #foryoupage #CapCut #fyp #foryou #viral #chavoshi #mohsenchavoshi #موحسین_چاڤۆشی #چاوەشی - @chavoshi.kurd