@voiceofpeople15: លោកបណ្ឌិត កែម ឡី អ្នកវិភាគនយោបាយ និងជាអ្នកស្រាវជ្រាវការអភិវឌ្ឍសង្គម ដែលត្រូវបានឃាតកបាញ់សម្លាប់ នៅក្នុងស្តាម៉ាតមួយ (Star Mart) ដែលស្ថិតនៅម្តុំស្តុបបូកគោ កាលពីព្រឹកថ្ងៃទី១០ ខែកក្កដា ឆ្នាំ២០១៦។ បើគេនិយាយពីទិដ្ខភាពនៃការស្លាប់របស់លោក កែម ឡី កាលពីថ្ងៃទី១០ កក្កដានោះ ប្រជាពលរដ្ឋ ដែលធ្លាប់ស្តាប់លោក កែម ឡី វិភាគរឿងនយោបាយ និងសង្គមនេះ ហាក់មិនទាន់អស់អាល័យឡើយ។ ទោះបីការស្លាប់របស់លោក កែម ឡី មានរយៈពេលពីរខែហើយក្ដី តែពលរដ្ឋទូទៅដែលមិនទាន់រសាយសេចក្តីសោកសៅពីក្នុងចិត្តនៅឡើយនោះ បាននាំគ្នាបន្តនិយាយ ដោយបង្ហោះសារ និងរូបភាពរបស់លោកបណ្ឌិត កែម ឡី នៅលើហ្វេសប៊ុករបស់ពួកគេ ។ ទាក់ទងនឹងករណីបាញ់សម្លាប់លោក កែម ឡី នេះ សមត្ថកិច្ច ក៏ពុំទាន់មានតម្រុយអ្វីបន្ថែមក្នុងសំណុំរឿងឃាតកម្មលោក កែម ឡី ដើម្បីវែកមុខរកអ្នកនៅពីក្រោយខ្នង នៃការបាញ់សម្លាប់អ្នកវិភាគនយោបាយនេះនៅឡើយឡើយ។ សមត្ថកិច្ច អះអាងថា កំពុងបន្តស្រាវជ្រាវ ដើម្បីឈានដល់ការវែកមុខអ្នកនៅពីក្រោយខ្នងឃាតកម្មនេះ ។ នេះបើតាមលោក ខៀវ សុភ័គ អ្នកនាំពាក្យក្រសួងមហាផ្ទៃ ដែលធ្លាប់ប្រាប់សារព័ត៌មានថ្មីៗកន្លងមក។ ងាកមកឃាតករដែលបាញ់សម្លាប់លោក កែម ឡី ដែលអះអាងថាឈ្មោះ ជួប សម្លាប់ វិញត្រូវបានតំណាងអយ្យការអមសាលាដំបូង បានសម្រេចចោទប្រកាន់ជនសង្ស័យរូបនេះពីបទឃាតកម្មគិតទុកជាមុន និង បទកាន់កាប់អាវុធគ្មានការអនុញ្ញាត តាមមាត្រា២០០ និងមាត្រា ៤៩០ នៃក្រមព្រហ្មទណ្ឌ។ ក្រៅពីចោទប្រកាន់លើជនល្មើស ព្រះរាជអាជ្ញាក៏ចោទប្រកាន់លើបុគ្គល ដែលបានលក់អាវុធឲ្យជនល្មើស ពីបទលក់អាវុធដោយគ្មានការអនុញ្ញាត តាមមាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះនិងគ្រាប់រំសេវ។ តែយ៉ាងណា អត្តសញ្ញាណអ្នកលក់អាវុធឲ្យជនល្មើសនោះទេ មិនទាន់មានការបញ្ជាក់ច្បាស់នោះទេ។ ចំណែកឯភរិយាលោក កែម ឡី គឺលោកស្រី ប៊ូ រចនា និងកូនៗ បានត្រឹមតែរង់ចាំយុត្តិធម៌នៃឃាតកម្មលើស្វាមី និងឪពុករបស់ពួកគេ អស់រយៈពេលពីរខែហើយ គិតចាប់ពីថ្ងៃទី១០ ខែកក្កដា រហូតមកដល់ថ្ងៃនេះ ។ លោកស្រី រចនា ដែលនៅតែសោកសង្រេង និងនឹករលឹកដល់ស្វាមីរបស់ខ្លួនយ៉ាងខ្លាំងផងនោះ បាននិយាយប្រាប់សារព័ត៌មានថ្មីៗយ៉ាងខ្លី តាមទូរសព្ទកន្លងមកយ៉ាងដូច្នេះថា៖«ខ្ញុំគ្មានសង្ឃឹមនឹងទទួលយុត្តិធម៌នោះទេ»។