+ ሳምራዊቷ ሴት + ሳምራዊቷ ሴት ነኝ።የምጠራው በአገሬ እንጂ በግለሰብነቴ ስም የለኝም።ዜግነት የጨዋነት ሽልማት አይደለም ፤ ሁሉም ክርስቲያን ባይሆንም ሁለም ዜጋ መሆን ይችላል።ወገኖቼ ሳምራውያን ገፍተውኝ እርሷ ባጠለቀችበት ጉድጓድ እኛ አንቀዳም ብለው ተፀይፈውኝ በሰማርያ ቃጠሎ በቀትር እገሰግሳለሁ ፤ ፀሐይ ከሰው አፍ በላይ አያቃጥለኝም።ትንሹ ድሃ ትልቁን ድሃ ይንቃል ፤ ትንሹ ኃጢአተኛም ትልቁን ኃጢአተኛ ይጠላል።የጉድጓዱ አፍ በትልቅ ቋጥኝ የሚዘጋ ፤ በኀብረት ካልሆነ ብቻ የማይንከባለል ነው።እኔ ግን ብቻየን አንከባልለዋለሁ።ውኃው እየጎደለ ከጥልቅ መሙላት ተቸግሬአለሁ። በየዕለቱ በንቀት ፣ በቃጠሎ ፣ በጥልቀት እኖራለሁ።ጌታ ሆይ ጉድጓዱ ጥልቅ ነው ፣ ጥልቁ ሰው የቆፈረው ነውና።ቁሜም ተምበርክኬም የማልደርስበት ወደ ጉድጓዱ በግማሽ ገብቼ ጭላጭ የምሰፍርበት ጉድጓዱ ጥልቅ ነው። ተናገር ጌታዬ የቀትር ጓደኛዬ ፤ ሰው የዘረጋው የኑሮ መዋቅር ፣ ከጥልቁ የወጣው ጥልቅ ዘዴ ፣ ስደርስበት የሚርቀው ጥላው ኑሮዬን ተናገረው።ተናገረኝ ኤፍታህ በለኝ! ድካሙ ብዙ ፣ እርካታው ትንሽ የሆነውን ጉድጓድ አስጥለኝ።ካለሁበት ድረስ የመጣኸው አንተ ምንጭ ኢየሱስ ሆይ! ፍለቅ።ዓለት ኃይልህን በበትር ሲመቱህ ለእስራኤል የፈለቅህ አንተ የበረሃው እርካታ ዛሬ ፍለቅ።እንደገና ከሰው ጉድጓድ እንዳልመላለስ አንተ ብሩኽ ምንጭ በሆዴ ፍለቅ።የቀዱት ያልቃል ፤ የማታልቅ ምንጭ ሆይ! ዛሬ በነፍሴ ፍለቅ።ከጥያቄዬ በላይ መልስ የሆንከው የማትደፈርሰው ምንጭ ሆይ! ዛሬ በደረቀው ነገሬ ላይ ፍለቅ።ፍለቅ ፥ ፍለቅ ፥ ተፍለቅለቅ የደስታ ነዶ ፥ የብርሃን ጎርፍ ሆይ! ፍለቅ ፣ ከማለቅ የምታድን ፍለቅ ፣ ስስት የሌለብህ ወደ ራስህ የማታስቀር ሆይ! ፍለቅ ፣ የማትጨረስ ቸርነት ኢየሱስ ሆይ! ፍለቅ።ጉድጓዱ ጥልቅ ነው ፣ አንተ ግን ፍለቅ..........። " እኔ ከምሰጠው ውኃ የሚጠጣ ሁሉ ግን ለዘላለም አይጠማም፥ እኔ የምሰጠው ውኃ በእርሱ ውስጥ ለዘላለም ሕይወት የሚፈልቅ የውኃ ምንጭ ይሆናል እንጂ፡ አላት። " (ዮሐንስ 4:14) 🙏 #እግዚአብሔር_ብርሃኔና_መድኀኒቴ_ነው #ኦርቶዶክስ⛪ተዋህዶ⛪ለዘለዓለም🙏ትኑር🙏 #orthodox - @jerusalem446