@fury187: ئازیزم دوێنێ شەو لە خەومدا جەنگێک هەڵگیرسا بوو ، لە خەومدا لەسەر بیرە نەوتەکان جەنگێکی گەورە هەڵگیرسابوو ، لە خەومدا هەمووان ئاوارە ببووین لە دوورگەیەکی بچووکی نیشتیمانێکی تردا هەموومان کۆ کرابووینەوە، لە خەومدا ماڵی ئێمە و ماڵی ئێوە لەگەڵ ماڵی حەمە و سارا خێمەکانمان لە تەنیشت یەکترەوە بوو، لە خەوەکەمدا بە ماڵی ئێمە و ئێوە یەک تەنکییە ئاومان هەبوو ،بەیانیان من و تۆ بە یەک سابوون دەموو چاومان ئەشۆرد و ناو لەپی دەستمان یەک بۆنی لێ ئەهات، لە خەومدا بە ماڵی ئێمەو ماڵی ئێوە یەک تەنافمان هەبوو و شەوێک کە هەمووان نوستبوون بە دزییەوە بلووسێکتم دزی تا شەوان بۆنی بکەم و بیخەمە ژێر سەرینەکەم ، بەڵێ ئازیزم لە خەومدا جەنگێک هەڵگیرسابوو جەنگێک پریشکی ئاگرەکەی نەگەیشتبووە هیچ شوێنێک ، جەنگێک هیچ زەرەرێکی نەبوو بەڵکو سوودی هەبوو چوونکە ماڵی ئێمەو ماڵ ئێوەی لە تەنیشت یەکتر کۆ کردبۆوە ، جەنگێک تاکە مردوو تیایدا ئەو کوڕە بوو کەئێستا خۆشەوویستتە، بەڵێ ئەزیزم لەو جەنگەدا ئەو کوڕەی ئێستا لەگەڵتایە مردبوو و لەبری ئەوەی تۆ ببینم لەگەڵ ئەو (خۆم و خۆتم) پێکەوە ئەبینی، بەڵێ ئازیزم لە خەوەکەمدا لەبری ئەوەی تۆو ئەو لەتەنیشت یەکتر ببینم خۆمانم ئەدی ، کە لەسەرەی نان پێکەوە ڕاوەستابووین ، یاخود لە کاتی کووتان بە ڤاکسینی کۆلێرا، یاخود لە کاتی وەرگرتنی تۆپەڵە برنجێکی خڕ کە ژەمی ئێوارەمان بوو، ئازیزم لە خەوەکەمدا هەموو ئێوارانێک دەچوومە بن دار قامیشێکی گەورە و پشتم پێوەی ئەدایەوە و بە شمشاڵێکەوە ئاوازی جوانیتم ئەژاند، بە شمشاڵەکەم لارو لەنجەی تۆم بە ئاوازێکی غەمگین ئەژەنی ، ئازیزم جار جارە پیرە پیاو ژن و مناڵەکانم کۆ ئەکردەوە و بە دەنگی بەرز چیرۆکم ئەخوێندەوە تا بگاتە بن گوێت، سەرباسی چیرۆکەکەم تۆ بوویت ، باسی چاوەکانتم ئەکرد ، باسی قژتم ئەکرد ، باسی نیگاکانت کە لەسەرەی نانا بۆت ئەکردم ، باسی بێوەفاییەکەتم ئەکرد و جار جار بە بێوەفا لە قەڵەمم ئەدایت چوونکە لە خەوەکەشمدا ڕۆژانی خوێندنم هەر بیر مابوو کە بەبەر چاوی منەوە قاقات لەگەڵ کوڕان لێ ئەدا، ئازیزی دڵم خەم مەخۆ کەس شکی نەکرد کە تۆ کچی ناو چیرۆکەکە بیت و کەس بە بێوەفایتی نەزانی چوونکە بە شێوەیەک باسی تۆم بۆ ئەکردن وەک ئەوەی ئەمە تەنها چیرۆکێکی خەیاڵی بێت، ئەوان نەیان ئەزانی کچی ناو چیرۆکەکە تۆیت و هەموو ئەوەی باسم ئەکرد ڕاستییە، ئازیزم لە جەنگەکەدا بینی چاوەکانت زۆر هاسان بوو ، هەر هێندەی لە خێمەکە سەرمدەرکردایە تۆم ئەبینی ، وە بەڕادەیەک لێک نزیک بووین کە شەوان گوێم لە دەنگی لایلایەی دایەت ئەبوو کە بۆ برا بچووکەکەتی ئەکرد تا بخەوێت، یاخوود گوێم لە دەنگی ڕادیۆکەی باوکت ئەبوو کە لەدرۆی هەواڵەکاندا بەدوای بەیانییەکی باشتردا ئەگەڕا ، ئەو بە هیواوە بوو ڕۆژێک لە هەواڵەکاندا گوێبیستی ئەوە ببوایە کە جەنگ کۆتایی پێ هاتووە ، ئەو نەی ئەزانی کە ئەم جەنگە هەرگیز تەواو نابێت چوونکە خودا بۆ ئەوەی من و تۆ لە نزیک یەکترییەوە بژێنێت چارەنووسمانی وا دانابوو کە ئەم جەنگە بێ کۆتایە هەڵبگیرسێ، بەڵێ ئازیزم هەمووان تاکە ئاواتیان ئەوە بوو زوو جەنگ تەواو بێت، تەنها من نەبێت ، چوونکە من لام جوانترین جەنگ بوو ، ئاخر ئازیزی دڵم پێم ناڵێیت چی لەو جەنگە جوانترە کە ماڵی ئێمەو ماڵی ئێوە لەژێر دوو خێمەدا نیشتەجێ بکات کە لەتەنیشت یەکترەوەن..؟؟، ئەزانیت ئازیزم ئەوان منیان بە شێت لە قەڵەم دابوو و ئەیان ووت کوڕی شمشاڵ لێدەرەکە شێت بووە چوونکە هەمیشە منیان بە پێکەنینەوە ئەدی و لایان سەیر بوو چوونکە ئێمە لە جەنگدا بووین کەچی هەمیشە ڕووخسارم بە پێکەنین بوو ، ئەوان نەیان ئەزانی کە پێکەنینەکانی من لەبەر ئەوە بوو کە هەموو ڕۆژ ڕووخسارە جوانەکەتم ئەدی، ئاخر ئازیزم بەس پێم بڵێ ئەکرێ من ڕووخساری تۆ ببینم و پێ نەکەنم..؟؟ ، ئەکرێ من بە بینینی تۆ دڵتەنگ بم و بیرم لای جەنگ بێت..؟؟، ئازیزم لەگەڵ ئەوەی ئەمە هەمووی خەونێک بوو بەڵام من بیری خەونەکە ئەکەم ، بیری ئەو شەوانە ئەکەم کە پێکەوە دا ئەنیشتین لەبەرامبەر ئاگرێکدا و تۆ سێر مانگت ئەکرد و منیش سێر تۆ ئاخر ئازیزم مانگەکەی من تۆیت ، ئەوەی لە ئاسمانە مانگی خودایە، بەڵێ ئازیزم ئێستا کاتژمێر چواری بەرەبەیانەو منیش تازە لە خەوەکەم خەبەرم بۆتەوە ڕاستی زۆر دڵتەنگم چوونکە ئەمە هەمووی خەونێک بوو ، ئاخر من ئەمەوێت ئەم خەونە ببێتە ڕاستی، هیچم لە دەست نایەت جگە لە نووسینی خەونەکەم و ئێستا خەریک نووسینم، بەڵام خەمێکی زۆر گەورەم هەیە چوونکە لە خەوەکەشمدا نەمتوانی پێت بڵێم خۆشمدەووێیت باشە قەینا ووتمان ئەمە هەمووی خەونە بەس بۆ لە خەونەکەشدا وشەی خۆشمدەوێیتم بە گوێکانتدا نە چرپاند..؟؟، بەڵێ ئازیزم وا دیارە لە خەونینیشدا من و تۆ بۆیەکە نابین.احمد.#احمد🎶🖤 #foryoupage #foryou #fyp #fypシ