ШЫМКЕНТТЕ ҚЫЗЫЛ СЫЗЫҚҚА ЕНГІЗІЛГЕН ҮШ ҚАБАТТЫ ҒИМАРАТ БҰЗЫЛДЫ Шымкент қаласында құрылыс нормаларын сақтау және қаланың сәулеттік келбетін жақсарту мақсатында ауқымды жұмыстар атқарылып келеді. Қалалық орта сапасы және бақылау басқармасының жұмыс жүргізуіңінің нәтижесінде бүгін С.Бәйтереков көшесі №7/2 мекенжайында орналасқан («КРОК» сауда орталығы) үш қабатты ғимарат бұзылды. Бұл жұмыс ғимараттың меншік иесімен өзара келісім негізінде жүзеге асырылды. Басқарма өкілдерінің айтуынша, мұндай шаралар тұрғындардың қауіпсіздігін қамтамасыз етіп, қала инфрақұрылымын жақсартуға бағытталған. Жалпы өткен жылы Шымкент қаласында сот шешімімен 4 құрылыс нысаны бұзылды. Бұл нысандардың барлығы құрылыс нормалары мен ережелерін сақтамаған немесе заңсыз тұрғызылғандықтан, сот тәртібімен сүрілді. Биыл тағы 8 құрылыс нысанын бұзу туралы сот шешімі қабылданды. Қазіргі уақытта бұл шешімдердің орындалуы сот орындаушыларының бақылауында. Аталған нысандардың қатарында заңсыз салынған немесе рұқсатсыз пайдаланылып жатқан ғимараттар бар. Қалалық орта сапасы және бақылау басқармасы құрылыс нысандарын заңға сәйкестендіру, қаланың сәулеттік келбетін жақсарту және тұрғындар үшін қауіпсіз орта қалыптастыру бағытындағы жұмыстарын жүйелі түрде жалғастыруда. Шымкенттің дамуына және тұрғындардың жайлы өмір сүруіне жағдай жасау басқарманың негізгі міндеттерінің бірі болып қала бермек. - @life_shymkent17