@musabko4: : مره انا وهو مفلسين لمن بنشحد في بعض حق الرصيد وفي نفس الوقت طولنا شديد من بعض وانا كنت ماره بي فترة إكتئاب وعلى قولو كل يوم عندي زمن معين بضرب أتبكى ليهو فيو، المهم يوم جاني مبسوط إنو إشتغل يوميه في مكانٍ ما وطلع ليهو قروش تكفيهو يجيني بالمواصلات في "أتني"، وانا مفروض أحنك أمي واشيل منها وهذا ما حصل. اتلاقينا وياهو الونسه وجبنتو الخالي دواء والشاي حقي بالفول، في اثناء الونسه قلت ليهو دا احلى ديت في الحياه، قال لي مجهز ليك حاجات احلى أبردي لي ، قمنا نتمشى وفجأه وقف جنب درداقة نبق وجاب لي لأنو عارف إني بحبو شديد، بعدها قعدني في مسطبه وجاء راجع شايل عيشتين حارات وطعميه وكاتشب وقزازتين بيبسي قزاز ربعنا رجلينا وكان تقريباً احلى فطور يمر علي، وفي اثناء ما احنا راجعين جينا مارين بي شجرة الياسمين قطع لي منها ورده واداني ليها، لمن جيت أركب المواصلات أداني ورقه وقال لي افتحها بعد العربيه تتحرك لقيت مكتوب فيها : "الى الرِيله البحبها للدين : ما تشيلي هم دامي معاك وم تخافي من بكره ربك كريم وقادر يفرجها زي م فرج كربتنا الليله، وانا باقي ليك زي النبق دايماً حاضر وقت زعلك، وزي الورده قادر اني ابسطك ، ويا الساكنه القِليب انا بيك وليك ومنك وفيك وعشانك قاعد وعايش، اوعك تصُري والله ما لايق عليك،. أبقي عافيه. من الحَبيب البريدك زي ريدتو للعدس وأكتر 💛." رسلت ليهو مسج : "بريدك زي ريدة ابوي لي امي، بريدك زي الخريف المطرتو بسيطه، بريدك زي السماء ولونها، وبريدك زي اللون الأصفر" - بحكي : نفسنتها دي كانت منفسنه بي اكتر من اي شي، انا متعود عليها وهي جايطه وبتهظر وتتريق، متعود عليها وهي بتنقنق لي،. انا م متعود انها تكون بتبكي طبيعي، وقت لميت لي قريشات وقررت أطلع معاها كان كل همي كيف انسيها الإكتئاب العايشاهو ولو ليوم واحد، كيف ارجعها هي الزمان، عملت لسته بالحاجات البتحبها وكونو "أتني" هو المكان المفضل ليها فهو الحنمشيهو، بدينا اليوم بالشاي بتاعها بالفول كانت مبسوطه بيهو وتشيل وتصور فيهو انا كنت غرقان في كل تفاصيلها، فرحتها بالنبق كانت كفيله انها تديني طاقه ايجابيه حقت شهر لي قدام، حبها للطعميه خلاني احب الطعميه اضعاف ما كنت بحبها، وعلمتني إنو البيبسي أسلوب حياه، كانت بتاكل وكل شويه بتقول لي " انا مبسوطه قدر فرحتي يوم قطر عطبره جاء" كنت حاسي إني أنجزت إنجاز كبير في حياتي، وقت الورده رجعت لي ورا وبقت تنطط كانو جبت ليها ورده من محل، م عارف إحساسها بعد قرت الورقه بس متأكد انها قعدت تتبسم وتتكشم في المواصلات وأكيد لو فتحت التلفون حلقاها مرسله لي " بريدك زي ريدة ابوي لي امي" وجملات تانيه تشبيه لي ريدتها لي بالحاجات البتحبها، انا ببقى بيها وم بتحمل فيها اي شي 💛. -حبو بعض يخوانا، املو الدنيا فرح

Musabko

Open In TikTok:

Region: SD

Saturday 15 February 2025 20:51:55 GMT