ከአማራ ፋኖ ሕዝባዊ ድርጅት የተሰጠ የሐዘን መግለጫ የጦሩ ፊታውራሪ አርበኛ ከፍያለው ደሴ ስሙን በወርቅ የጻፈ የአማራ እና የኢትዮጵያ አይተኬ ልጅ ነው!! (ሚያዚያ 4/2017 ዓ.ም.) **** የአማራ ፋኖ የትግል ምልክት የሆነው የድርጅታችን ሥራ አስፈጻሚ አመራርና የአማራ ፋኖ ጎንደር ጠቅላይ ግዛት ዕዝ ተቀዳሚ ምክትል አዛዥ የጦሩ ፊታውራሪ አርበኛ ከፍያለው ደሴ፣ በዓላማ ቢስ ከሃዲያን ከጀርባው ተወግቶ በመሰዋዕቱ የአማራ ፋኖ ሕዝብዊ ድርጅት (አፋሕድ) መራር ሐዘን ተሰምቶታል፡፡ የጦሩ ፊት አውራሪ አርበኛ ከፍያለው ደሴ በአማራ ሕዝብ የኀልውና ትግል ውስጥ ከፊት መስመር የሚቀመጥ የአማራና የኢትዮጰያ አይተኬ ልጅ ነው፡፡ ቀደም ሲል አማራ ላይ በአደባባይ ዝተው ጦር ያዘመቱ የሕወሓት ታጣቂ ፅንፈኞች በጋሸና የቆፈሩትን "አይሰበሬ ምሽግ" ከደረመሱት ጀግኖች መካከል ከፊት የቆመው መሪችን አርበኛ ከፍያለው ደሴ ነበር፡፡ ብአዴን ከእነ ርዝራዡ ከጋይንት ምድር ተጠራርጎ ፈርጥጦ በነበረበት በዚያ ወቅት፣ አባት አርበኞችንና ወጣት ፋኖዎችን አስተባብሮ ሰፊውን ቀጠና ከፅንፈኞቹ የጦር ወረራ በጀግንነት የተከላከለ የቁርጥ ቀን መሪ ስለመሆኑ መላው ሕዝብ ህያው ምስክር ነው፡፡ የጦሩ ፊታውራሪ አርበኛ ከፍያለው ደሴ የአማራ ሕዝብ የኀልውና ትግል ወደሙሉ የትጥቅ ትግል በተቀየረበት ምዕራፍ፣ የመጀሪያውን ድል ሐምሌ 26/2015 ዓ.ም. በደብረታቦር ከተማ የለኮሰውም የትግሉ ምልክት ነው፡፡ በወቅቱ የመጀመሪያውን የፋኖ ትግል በአራት አቅጣጫ መርቶ የደብረ ታቦር ከተማን ሰብሮ በመግባት፣ ወደወሎ ጋሸናና ላሊበላ ሊጓዝ የነበረውን አንድ ሙሉ የብልጽግና ክፍለ ጦር ከጥቅም ውጭ በማድረግ የትግሉን ችቦ በቀዳሚነት ለኩሶታል፡፡ የጦሩ ፊታውራሪ አርበኛ ከፍያለው ደሴ፣ በአማራ ፋኖ ሕዝባዊ ድርጅት ውስጥ ግዙፍ ክፍለጦሮችን ከሚመሩ ቀዳሚ መሪዎቻችን አንዱ ነበር፡፡ ለአማራነት ክብር፣ ለሰማዕታት የትግል አደራና ለድርጅታዊ ትግልና ወታደራዊ ሥርዓቶች ከፍተኛ ቦታ ይሰጥ የነበረው መሪያችን ላይ የተፈጸመው ክህደት በሕዝብና በታሪክ ፍርድ የሚያሰጥ ነው፡፡ ላለፉት ዘጠኝ ወራት አንድ አማራ አቀፍ ድርጅት ለመመስረት የተቸገሩ የተወሰኑ ግለሰብ አመራሮች፣ ከተመሰረተው አማራ አቀፍ ድርጅታችን ጋር በቅንነት አብሮ ከመስራት፣ ወይንም አማራጭ ሃሳብ የያዘ ድርጅት ከመመስረት ይልቅ፣ ለአማራ ሕዝብ አንድያ የሆነውን ድርጅት ለማፍረስ እንቁ መሪዎቻችንና ታጋዮቻችንን ለመምታት ቃታ ስበዋል፡፡ በሚያሳፍር መልኩ ደግሞ፣ "ወልቃይት እና ራያን በኃይል እናስመልሳለን" ከሚሉ የሕወሓት ፅንፈኞች ጋር እንደሚሰሩ በአደባባይ ከመናገራቸውም ባሻገር፣ ከፅንፈኞቹ ተልዕኮ እና የጦር ቁሳቁሶች እየተቀበሉ ጦር እስከማዝመት መድረሳቸውን በአደጋ ቀጠና ውስጥ የሚገኙት የወልቃይት እና ራያ ነዋሪዎች፣ እንዲሁም መላው የአማራ እና የኢትዮጰያ ሕዝብ ልብ ይበልልን። በአማራ አርበኞች አጥንትና ደም የጎመራውን የኀልውና ትግል ለአማራ ታሪካዊ ጠላቶች አሳልፈው ለመስጠት እየሰሩ ያሉ ጥቂት ከሃዲያን አመራሮች በከንቱ ይባዝናሉ እንጂ፣ የአማራ ሕዝብ በደሙ የጨበጣቸውን ድሎች በፍርፋሪ አይለውጥም። የአማራ ፋኖ ሕዝባዊ ድርጅት የጦሩ ፊታውራሪ ከፍያለው ደሴ ለከፈለው ውድ የሕይወት ዋጋ መራር ሐዘኑን እየገለጠ፣ መላ ሠራዊታችን፣ ደጋፊዎቻችን እና ህዝባችን በተከታታይ ለምናስተላልፋቸው መመሪያዎች እና ትዕዛዝ በተጠንቀቅ እንዲጠብቀን እናሳስባለን። የአማራው የኀልውና ትግል ያጣው አይተኬ ጀግና አርበኛ ክፍያለው ደሴ፣ በታሪክ ማህደር ስሙን በወርቅ ቀለም የጻፈ በመሆኑ በትግል ፍሬዎቹ እና በሕዝቡ ህሊና ሕያው ሆኖ ይኖራል። አደራ ጥሎብን ስላለፈም፣ ትግሉ ተጠናክሮ ይቀጥላል፤ ታጋይ ይሞታል እንጂ ትግል አይሞትምና። ክብር ለሰማዕቶቻችን! ድል ለአማራ ፋኖ እና ድርጅቱ አፋሕድ! ድል ለአማራ ሕዝብ! ድል ለኢትዮጰያ ሕዝብ! የአማራ ፋኖ ህዝባዊ ድርጅት የፍይናንስ አሰተዳደር መምሪያ ኃላፊ፣ የአማራ ፋኖ በጎንደር የዘመቻ መምሪያ ሃላፊ እና የገብርዬ ክፍለ ጦር ዋና አዛዥ ሜጀር ጄነራል ከፍያለው ደሴ። #AFPO #ስርነቀልለውጥ #AmharaGenocide #AmharaResistance መውጫችን ማሸነፍ ብቻ ነው። Amhara Fano people’s organization የዐማራ ፋኖ ሕዝባዊ ድርጅት (አፋሕድ ) #ስርነቀልለውጥ #AFPO #አፋሕድ #AmharaResistance #AmharaGenocide - @amharahq