@mazenkonika1: بيحكي... معرفتي بيها كانت عن طريق الفيسبوك،كنت متابع بوستاتها ومعجب جدا بطريقتها في الكتابة وبنتظرها بفارغ الصبر تنزل بوست عشان اتفاعل واعلق عليهو ... عدت ايام وحبها بيزيد في اعماقي بدون ما اشوفها حتى !فقررت ارسل ليها رسالة في الخاص .. اتشجعت ودخلت ليها بطريقة ظريفة ،مرت ٤ ايام ورسالتي معلقة ويئست من انها تفتحها او ترد علي ،ولكن فجاة كدا في نص الجوطة حقت الشغل وصلتني رسالة فتحت تلفوني ولقيتها منها ،في اللحظة ديك حسيت نفسي ملكت الدنيا ومافيها ،اتعرفنا،اتكلمنا،اتبادلنا الافكار والاغاني وكل تفصيل جميل ممكن الواحد يعيشو ! كنت عايزها زوجتي عايز اكمل حياتي معاها وقررت انو دي الانسانة البتستاهل اتزوجها بس الظروف كانت واقفة لي ،كنت شاب عادي وماشغال وماعندي بيت وماجاهز من كل النواحي ،سألتها بتقبلي تتزوجيني بس ماحقدر اقدم ليك كل النفسك فيهو وكل احلامك زي اي بت ! ردت لي بجملة ظلت عالقة في ذهني ليوم الليلة وهسا هي قدامي ومعاي . قالت.. الزواج عبارة عن اتنين عايشين الحياة بحلوها ومرها وانا مستعدة اقاسمك ليها والزول مابعرس عشان يحقق احلامو على حساب التاني كفاية اننا قادرين نكون سوا ونحققها مع بعض بالفي والمافي . اتقدمت ليها وربنا سهل امرنا اهلها وافقو وعملنا عرس بسيط ،وفعلا عاشت معاي الحلوة والمرة والحمد لله اني قادر اصنع في وشها ابتسامة بأبسط حاجة ممكنة،وبفضل الله وضعي اتحسن وحاليا عايشين احسن عيشة الحمد لله . وعلى خواتيم الحلال ... في تنازلات بتخليك تدفع تمنها طول عمرك اذا كانت مع الشخص الغلط ،نفس القصة قد تكون مع شخص تاني وبعد امورو تظبط يتخلى عن زوجتو ،وكتير من البنات بشوفو انو العرس البسيط رخصة واهانة ، كلنا بنتمنى عرس فخم ومهر غالي وكل وحدة فينا بقسمتها طبعا وممكن يجيك زول وضعو كويس بس بعد الزواج تكتشفي مصائب ،وممكن يجيك زول وضعو يدوبك بس قادر يقدم ليك اكل الحب البتستحقيهو ، لو عندك شخص في حياتك عايزك واوضاعو ما بتسمح يعمل ليك كل شي عايزاهو لكن مناسب ليك !اتزوجيهو لانو انتِ ما سلعة عشان يشتروك بسعر غالي كفاية انك تتزوجي شخص قادر يحبك ويصونك ويقدم ليك البسعدك حسب امكانياتو والاهم هو الرضى ❤️.. العرس ساهل لكن الاختيار صعب وفي النهاية كلها احتمالات وتجارب حياتية بس انتو اختارو صح عشان ماتندمو . #ترتيل_عبد_الرحمن "ريتا" #كونكا #سودانيز_تيك_توك🇸🇩
