@preahreach_kh: ក្រុមប្រឹក្សារាជសម្បត្តិ គឺជាស្ថាប័នកំពូលរបស់ជាតិក្នុងការជ្រើសរើសព្រះមហាក្សត្រ និងធានាដំណើរការជាប្រក្រតីភាពនៃរបបរាជានិយមអាស្រ័យរដ្ឋធម្មនុញ្ញ។ ចំពោះសមាសភាពនៃក្រុមប្រឹក្សារាជសម្បត្តិមានចំនួន ៩អង្គ/នាក់ ដែលសុទ្ធសឹងជាឥស្សរជនជាន់ខ្ពស់ជាតិទាំងស្ថាប័នសភា រាជរដ្ឋាភិបាល និងសម្ដេចព្រះសង្ឃរាជ។ សម្រាប់កិច្ចប្រជុំរបស់ក្រុមប្រឹក្សារាជសម្បត្តិ គឺត្រូវបានកោះអញ្ជើញដោយប្រធានក្រុមប្រឹក្សារាជសម្បត្តិ ខណៈសមាជិកយ៉ាងតិច ៣រូបអាចលើកសំណើសុំឲ្យកោះប្រជុំបាន។ កិច្ចប្រជុំក្រុមប្រឹក្សារាជសម្បត្តិចាត់ទុកជាបានការ លុះត្រាតែមានសមាជិកយ៉ាងតិច ៥រូបបានចូលរួមប្រជុំ។ ទន្ទឹមនេះ ការអនុម័តរបស់ក្រុមប្រឹក្សារាជសម្បត្តិ ត្រូវបានយកតាមមតិភាគច្រើនដាច់ខាត គឺ៥សំឡេងឡើងតាមរយៈការបោះឆ្នោតដោយសម្ងាត់។ ចំណែក ប្រធានក្រុមប្រឹក្សារាជសម្បត្តិ មានភារកិច្ចដឹកនាំអង្គប្រជុំក្រុមប្រឹក្សារាជសម្បត្តិ ទទួលសេចក្ដីសម្រេចនានាដែលក្រុមប្រឹក្សារាជសម្បត្តិបានអនុម័ត ហើយចាត់ចែង និងរ៉ាប់រងការអនុវត្តច្បាប់ទាំងឡាយដែលទាក់ទងនឹងការគ្រងរាជសម្បត្តិរបស់ព្រះមហាក្សត្រ។ ដោយឡែក សមាជិកក្រុមប្រឹក្សារាជសម្បត្តិចាប់ពី ៣រូបឡើង អាចឧទ្ទេសនាមបេក្ខជនព្រះមហាក្សត្រថ្មីបានមួយអង្គ ខណៈសមាជិកក្រុមប្រឹក្សារាជសម្បត្តិមួយរូបៗ មានសិទ្ធិជ្រើសបានតែបេក្ខជនមួយអង្គប៉ុណ្ណោះ។ ក្សត្រាដែលត្រូវបានជ្រើសរើសជាព្រះមហាក្សត្រ លុះត្រាជាសមាជិកនៃព្រះរាជវង្សានុវង្សខ្មែរ ដែលមានព្រះជន្មយ៉ាងតិច ៣០ព្រះវស្សា ហើយជាព្រះញាតិវង្សនៃព្រះមហាក្សត្រ អង្គឌួង ឬព្រះមហាក្សត្រ នរោត្តម ឬព្រះមហាក្សត្រ ស៊ីសុវត្ថិ និងមានសមត្ថភាពគ្រប់គ្រាន់ក្នុងការបម្រើប្រជារាស្ត្រ និងមាតុភូមិ។ មុនឡើងគ្រងរាជសម្បត្តិ ព្រះមហាក្សត្រថ្មីទ្រង់ថ្លែងសច្ចា ប្រណិធាននៅបន្ទាប់ពីថ្ងៃដែលក្រុមប្រឹក្សារាជសម្បត្តិចេញសេចក្ដីសម្រេចផ្លូវការ៕ យោងតាមព្រះរាជក្រម និងចម្លងជូនដោយ៖CPRR