قصة أسره وكيف كان رحمه الله 👇 المعركة كانت في الشهر الثالث في هذه الحرب وكان تجهيزنا تم في معهد التدريب المهني والغرض عملية نوعية هجومية واسعة الغرض منها احداث خسائر في العدو واستنزافه واشغال مليشيات الجنجويد في كل من بحري وشرق لتخيف الضغط على القوة الكانت طالعة مننا وماشة توصل امداد للقيادة والاشارة فتحركنا بعد التشكيل العسكري الهجومي والاخ حذيفة اذكر قبل مانتحرك قال لي ياحسن الشهادة دي كن جاتني حبابها عشرة واقسم بالله دايرها قلت ليهو يازول انت جادي وصادق فعاين لي بنظرة قوية وقال لي كيف يعني ما جادي دا جهاد ياحسن ما لعب فالمهم تحركنا وكان ضارب رشاش قرنوف يعني وكان معاهو مزخر شايل ليهو احتياطي الذخيرة وهو عندو شريط احتياطي برضو غير المركب في السلاح فقلت ليهو ياحذيفة جيب الشريط لأنو كدا تقيل عليك فشلتو منو وحصلنا المسلخ حق الكدرو وكانت سريتنا سرية احتياطي تقفل ضهر القوتين القدامنا وتمنع الالتفاف وكان الكلام دا حوالي الساعة 11 ونص صباحا فاستلمنا مواقعنا وانتشرنا انا وحذيفة مشينا الناحية الشمالية للمسلخ وكان زمن الظهر دخل فصلينا الظهر والعصر جمع تقديم ورجعنا ارتكزنا مع باب المسلخ الصغير وفجأة كثافة نيران العدو كترت واتفاجأنا بالتفاف وبدأت المعركة استطعنا صد الهجوم الاول والثاني والعدو طلب فزع من الجيلي ويحري وشرق النيل وزاد الضغط علينا نسبة لكذا شي ما اقدر اوضحو وبعدها مشينا البوابة الرئيسية لانو الهجوم عليها كان شديد واقوي وتبادلنا النيران مع العدو وانا لقيت غرفة فوق البوابة فيها ساتر جيد وكاشفة فطلبت وقلت قرنوفات تعالو فوق واثناء ما انا فوق الغرفة وبكورك جيب رشاش لأنو في اهداف بشرية كتيرة فواحد مد لي رشاش واثناء ما انا عايز اشيل الرشاش لمحة الشهيد باذن الله حذيفة وكانت اخر نظرة شوفتو شايل رشاشو ومتوجه نحو الاتجاه الجنوبي للمسلخ كان في تسلل ومع انشغالنا بظروف المعركة الي كانت شرسة جدا جدا لدرجة انك ماتسمع صوت سلاح الانت ضاربو من قوة نيران العدو وكثافتها وبعد مايزيد عن 4ساعات جاتنا تعليمات يالانسحاب وانسحبنا بالبوابة الشرقية ولمن جينا نتفقد الموجود منو والمفقود منو فقدنا حذيفة وبلغنا الاخ بلال انو حذيفة تم أسره وشفنا الفديوهات وقلت ليهو أسروهو كيف الزول دا قال لمن كنا منسحبينا كان في واحد مصاب وواقع ومابقدر امشي حذيفة اصر اصرار شديد ارفعو وقال مايخليهو واداني بندقيتو ورشاشو ورفع المصاب والوقت داك الدعامة خلاص جونا وشافونا وفتحو فينا نار ضربو حذيفة في صدره ووقع وانا وقعت في حفرة وماشافوني والمصاب كر نفسو وخشا في اسطوانة وحذيفة اسروهو واليوم تأكد خبر موته رحمه الله رحمة واسعة واسكنه فسيح جناته يارب العالمين 💔 . فجزاك الله خيرا ياحذيفة وجمعنا واياك في عليائه مع النبيين والصديقين والشهداء وحسن اولئك رفيقا 😭 ورحم الاخ عمر ضحية واب احمد وود الماحي وماهر وغيرهم من شهداء 30/6 بلسان دفعتنا حسن - @wdalteraifi