وياهلا بحبيباتي ومكملين مع بعض دورة خروف العيد واليوم وصفة لمحبي وعشاق الرأس والكراعين والكرشة والمصارين🤗 طريقتي بتنظيف وطبخ الرأس والكراعين والكرشة والمصارين: 1️⃣الرأس: أنظفه بالليفة السلك حتى يروح كل السواد اللي فيه وبعدين أفتح من جوانب الفم بالسكين وأفتح الحنوك وأنظف اللسان والأسنان وكذلك فتحة من جوانب الأنف وأخلي الماء يجري داخله وأنظف الأذان ويكون جاهز. 2️⃣الكراعين هي أرجل الخروف نعرضها على النار ونسمي هالحركة حسحسة أو شلوطة لين ينظف الكراع من الشعر تعطي طعم لذيذ وبعد ماننتهي من الحسحسة نفرك بليفة ناعمة حتى يروح أثر النار ونشيل الحوافر اللي هي طبقة قاسية تغلّف رجل الخروف ونفتح فتحة بسيطة وسط الكراع من الأمام لإزالة الشعر من داخل وفيه غدة صغيرة ضروري نشيلها ثم نغسلها بماء دافئ وإذا كان الكراع طويل أكسره نصفين ويكون جاهز. 3️⃣ طريقة تنظيف الكرشة اغسلها بالماء عدة مرات وأنظفها من الداخل اذا فيها شوائب أو قطع شحم بعدين احطها بماء حار مع زنجبيل طازج وملح وعصير ليمون وخل وممكن ملعقة صغيرة بيكربونات الصوديوم لمدة دقيقتين ماأطول علشان ماتطلع قاسية أو أنقعها بسفن أب لمدة نصف ساعة بعدين اذا ماتبين الوبر حكيه بسكين أو هو يطلع بيدك لين يصير لون الكرشة أبيض وبكذا تكون جاهزة وريحتها حلوة بعدين أقطعها مربعات. 4️⃣ طريقة تنظيف المصران :أغسلها زين تحت الماء بعدين أقلبه وأنظفه من الداخل وأحطه بماء دافي مع ليمون وملح وخل وزنجبيل رطب أو بودرة واخليها شوي بعدين اصفيها من الماء وتكون جاهزة بعدين آخذ قطعة كرشة وألف عليها المصران بشكل حلو مثل مكرة الخياطة وبعدين اربط الطرف واقطع المصير وهكذا أكرر العملية حتى تنتهي عندي الكمية وممكن أرش الكرشة من الداخل بكمون وفلفل أسود قبل أو أحط داخلها قطعة شحمة تطلع لذيذة. ✴️طريقة الطبخ: أجيب قدر الضغط وأحط فيه الراس والكراعين والكرشة واغطيها بالماء الفاتر واحطها على النار تغلي لمدة ربع ساعة بعدين اتخلص من الماء والهدف من هذه الحركة حتى يروح الدسم منه ، بعدين أقطع عليهم حبة بصل كبيرة وحبة طماطم وفلفل بارد وفلفل حار وليمون بالقشر مفرومين ناعم وملعقة معجون طماطم وقطعة زنجبيل رطب وكمون وفلفل أسود وكزبرة وكركم وملح خشن وممكن ثوم بعدين أصب عليه كوب أو كوبين ماء وأسكر قدر الضغط وأخلية على نار عالية من أسمع صوت الصفارة أقصر النار وأخليه نصف ساعة أو على حسب حجم الخروف بعدين أقدمه مع خبز حار أو رز أبيض وصحتين وألف عافية👌🏼 #طبخ #طبخات #لذيذ #سهل_وسريع #اكسبلور #ترند #خروف #خروف_العيد #طبخ_الذبيحة #كرشة_خروف #مصارين #المصارين #الكراعين #الكرعان #مقادم_غنم - @mshael_alturifi