@life_shymkent17: Шымкент қаласы — еліміздің ірі мұнай өндіруші кәсіпорындарының бірі саналатын «Теңізшевройл» компаниясының отандық бизнесті қолдауға бағытталған бастамасын жүзеге асыра бастаған алғашқы өңір. Делегацияның мегаполиске келген сапары аясында шымкенттік тауар өндірушілердің өнімдері қойылған көрме ұйымдастырылып, кәсіпкерлермен келіссөздер өтті. Шымкент қаласының әкімі Ғабит Сыздықбеков «Теңізшевройл» компаниясының өкілдерімен және жергілікті кәсіпкерлермен кездесті. Келіссөздер нәтижесінде ынтымақтастық пен өнім жеткізу саласында төрт меморандумға қол қойылды. Жаңа серіктестер қатарында жергілікті кәсіпорындар — «Барыс-2007» ЖШС, «Baiterek Agro» ЖШС және «Intermilk Kazakhstan» ЖШС бар. Сонымен қатар, «Hill Corporation» ЖШС мен «Теңізшевройл» арасында жағармай материалдарын жеткізу жөнінде келісімшарт жасалды. Off-take үлгісіндегі мұндай келісімшарттар жергілікті өндірушілерге тұрақты тапсырыстар мен даму мүмкіндіктерін қамтамасыз етеді. Бұл өңірдің өндірістік әлеуетін нығайтуға және ірі өнеркәсіптік жобалардағы қазақстандық құрамды арттыруға бағытталған маңызды қадам саналады. Кездесу қатысушылары «Мұнай-газ машинасын жасауды дамыту жөніндегі халықаралық орталық» қауымдастығымен бірлескен жобаларды іске асыру перспективаларына ерекше назар аударды. Келесі кезеңде KMG Kashagan B.V., Карачаганак Петролеум Оперейтинг (КПО) және North Caspian Operating Company (NCOC) секілді ірі мұнай-газ компанияларының өкілдерінің Шымкентке сапарын ұйымдастыру туралы келісімге қол жеткізілді. Сапар аясында ынтымақтастықты кеңейтуге және жергілікті кәсіпкерліктің әлеуетін арттыруға бағытталған жаңа келісімдерге қол қойылады деп жоспарланып отыр. #lifeshymkent17 #ғабитсыздықбеков #тенгизшевройл
