مرة من المرات چنت أمشي داخل البيت لا مستعجل ولا وراي شي مهم مجرد أمشي طبيعي بس سبحان الله خطوة بسيطة وخطأ بسيط نضرب أصبعي الصغير بحافة ميز الطعام الوجع چان رهيب مو طبيعي لحظة حسيت رجلي تفجرت گمت على وحدة وگعدت على أقرب كرسي أصبعي صار ينبض كأنه كلب وعيوني دمعت من الوجع رغم إنه شي بسيط وگلت بيني وبين نفسي شنو هذا ؟ شلون شي صغير هيچ يأذيني؟ استمر الألم ساعات ما كدرت ألبس نعال ولا أدوس عدل بس بعد كم ساعة شوي شوي الوجع خف وباليوم الثاني نسيت حتى إنه صار بس هاي اللحظة ضلت ترن براسي لأن ورا الألم الجسدي چان اكو شي بدا يحچي وياي من الداخل تذكرت وجع ثاني وجع أكبر بس مو بأصبع ولا بجسم وجع القلب وجع النفس وجع الروح تذكرت شگد عدنا آلام نعيشها يوميًا مو من طگّة ميز لا من طگّة الحياة وجع نعيشه من تعب الشغل من الدراسة وضغطها من المستقبل اللي ما نعرف وين يودينا من شخص نحبّه وابتعد من حلم تمنيناه وما صار من أمل ضاع من كلمة جارحة من موقف كسَرنا تذكرت الأيام اللي ننام بيها وإحنا موجوعين ونضحك بوجه الناس وإحنا جوّاتنا نحترك تذكرت اللحظات اللي نكابر بيها ونكول ماكو شي بس الحقيقة ؟ إحنا تعبانين وهنا فهمت شغلة مهمة إذا أصبع صغير گدر يوقفني عن المشي كم ساعة فشلون بيه ألم جوّه قلبي عايش وياي شهور؟ ليش أتوقع من نفسي أعيش طبيعي وأنا موجوع من الداخل؟ العبرة والدرس الوجع ما يفرق بين جسد وكلب الوجع وجع والكل يحتاج وقت يطيب مو كل ألم يبين لكن كل ألم يستحق نعتني بيه لا تسكت على وجعك ولا تستهين بروحك مرات نطيح مو لأنّا ضعاف بس لأن التعب تراكم والألم صار أكبر من تحملنا أنت مو مجبور تتحمل دوم اخذ وقتك بكَفّي صبر خليك رحيم بنفسك مثل ما تدهن إصبعك المجروح ادهن كلبك بكلمة طيبة بنوم مريح بدعاء بقرآن أو بفضفضة لصديق يفتهمك ماكو شي يبقى للأبد لا وجع الأصبع بقى ولا وجع القلب يبقى كلشي يروح بس إنت خليك صبور وأهم شي؟ لا تخلي وجعك يعزلك إحچي أطلب المساعدة ولو بكلمة تعبان ترى إحنا بشر مو حديد نصيحة كلنا نمر بظروف صعبة وكلنا نعيش أيام نحس بيها إن الحياة ضدنا بس صدگني كل ألم يمر عليك هو جزء من نضوجك جزء من صبرورتك جزء من إنك تصير أقوى بس لا تنسى القوة مو إنك تكابر وتسكت القوة الحقيقية هي إنك تعترف بتعبك وتداوي نفسك. #مقـتطـفات_حسن_عواد - @1i._gg