- نفسك في إيه يا بوجي بعد سنين العذاب دي كلها وبعد ما اتعافيت من الإدمان؟ = أملي في ربنا كبير جدًا إنه يعوضني عن حاجات كتير اتحرمت منها في طفولتي وفي سن المراهقة، أملي إنه يرحمني ويسامحني على كل اللي عملته في نفسي وأنا في مرحلة الإدمان النشط، لأني ببساطة مكنتش في وعيي، كنت تحت سيطرة، وهي اللي كانت متحكمة في حياتي بالكامل. أملي في ربنا إنه يكافئني على الأيام الصعبة اللي قضيتها وأنا بعالج نفسي. ومن نعم ربنا عليا دلوقتي إني بقيت مقبول في المجتمع وأمي بتحبني، وأبويا رجع يفرح بيا، وأخواتي بقوا يتشرفوا بيا تاني، وصحابي في الشغل فرحانين بيا وبيحبوني جدًا.❤️ محمد مسعود رزق الشهير بـ 'بوجي' شاب ابن ناس ومتعلم ومثقف وابن بلد ، وكان شغال شغلانة محترمة، لكن لما قابل ناس بتشرب مـ.ـخـ *درات، الفضول غلبه .. وبسبب الفضول كان هو بداية الهلاك, جرب ومن ساعتها مارجعش اتكاسل في شغله، وسلوكه اتغير، لحد ما اكتشفوا إنه بيسرق من المكتب .. اتطرد من شغله، واتقفل في وشه أي باب رزق بدأ يتدهور أكتر، وبقى يشرب بشراهة، وسلوكه كان غير أخلاقي وبتاع مشاكل وسرقة وتعدي وكل حاجة وحشة في نص ده كله كان بيحب بنت وبيحلم يتجوزها ووصفها بحب عمره بس الظروف كانت صعبة، ومعندوش حاجة يقدمها واعترفلها إنه مدمن وماعهوش فلوس يخطبها وأنه بيدور علي شغل بس مش متوفق البنت دي مانصحتهوش أو قالتله كفاية ووقفت جنبه ، بالعكس أقنعته بحاجة غريبة الشيطان نفسه ماتجيش في باله .. "أقنعته إنه يبيع كليته بـ 100 ألف جنيه عشان يجيبوا فلوس للجواز" وللأسف بسبب إحساس بوجي بالتقصير شاف أن ده الطريق الوحيد وعلشان بيحبها صدقها أنه مفيش حل تاني، وبالفعل أقنعته أنه يقابل أخوها لأنه هو كمان باعها قبل كده، أخوها بدوره وصله بحد كبير في المجال ده وخدوه على مستشفى مشبوهة، ظبطوله اجراءات الورق والتحاليل والأشاعات، وخلوه يصدق إن الموضوع عادي، وأجروا العملية، وهناك بوجي أتعرض للتعذيب، كسروله ضلع، وخدوا كليته، وخرج منها شايف المـ*ـوت بعينه بعد ما كان فاكر أنها عملية سهلة سابلها جزء من المبلغ وخلى جزء معاه، وبعدها بفترة راح يعترف للبنت إنه صرف الفلوس الي معاه عالمـخـ*ـدرات، وأتخانقوا وسابته وتخلت عنه بعد ما خلته يعمل كده فـ نفسه، أختارت نفسها بعد ما دمرته، ومن حب محمد ليها ماصدقش أنها هي اللي عملت فيه كده وأقنع نفسه أنه هو السبب .. كل ما الوقت يعدي كل الناس بتبعد عن بوجي ومحدش حابب يتعامل معاه وفضل لوحده فترة طويلة هو والمخـ*ـدرات، مفيش حد جنبه غير أمه اللي كان متعلق بيها جداً، وكانت السند الوحيد في حياته مع الوقت بوجي أبتدى جسمه ينهار بسبب العملية وكتر السموم اللي بتخش جسمه وفقد الوعي أكتر من مره وكان بيمـ*ـوت فـ يوم فاق لقى نفسه مستشفى الدمرداش والدكاترة ملمومين حواليه ومستغربين حالته وقالوله أنت ازاي لسه عايش؟ .. أنت مفيش عضو سليم في جسمك!! طلع من المستشفى بعد ما قدر يوقف على رجله, وأتصدم لما لقى أمه تعبانة وجاتلها جلطة ونص وشها مش بيتحرك بسبب اللي بتشوفوه بيحصل في عيالها وبرغم كده برضو بوجي متابش ولا أتعلم والأدمان كان هو الأقوى، وفضل مكمل في حين أن جسمه متدمر بسبب عملية الكلى والتـعاطي وجسمه هزيل وضعيف وأمه تعبانة لحد ما جيه اليوم الأصعب في حياتهم، بعدها بفترة قصيرة، لقيوا أخوه الكبير ميـ*ـت في الشارع من جرعة مخـ*ـدرات زيادة، في حته مقطوعة كده بوجي بيقول أنه أخوه وصل لمرحلة أصعب منه بكتير، مرحلة أنت بتقابل فيها ملك المـ*ـوت بنفسه الصدمة دي كسرت قلب أمه وقلب بوجي وحسسته أنه خسر كل حاجة كانت حلوة في حياته، لكنها كانت نقطة التحول وبداية الرجوع وراح لأمه قالها أنه عاوز يبطل، أحجزيني في مصحة ولا أي حاجة أنا نفسي أتعالج يا أمي وبالفعل تواصلت مع أحد الجيران يساعدهم وأبتدى رحلة العلاج، ومع الوقت أبتدى يتعالج ويتعافى وسلوكه وحياته أتغيرت 180 درجة وبطل من سنتين بس المرة دي طلع "محمد مسعود رزق" بدأ حياة جديدة وبقا مواظب على لعب الرياضة والجيم واتعرف على صحبة نضيفة وطيبة وأمه وأبوه وأخواته بقوا يتشرفوا بيه ويحبوه أكتر من الأول وأشتغل شغلانة شريفة والنهاردة طلع علشان يحكيلنا قصته أكتر جملة مؤثرة قالها محمد في الفيديو : "أنا محمد مسعود .. ما عنديش 32 سنة، أنا عندي سنتين ، لسه مولود من سنتين." القصة دي تعلمك قول الله عز وجل : ﴿إِنَّ اللَّهَ بِالنَّاسِ لَرَءُوفٌ رَّحِيمٌ﴾ ❤️ #trendingreels #مصر #viral #fyp #foryouシ - @neferdidi.news