"အမေစုလွန်သွားချိန်မှာ ဘယ်သူတွေ ဘာလုပ်မလဲ၊ အချိန်ရှိပါသေးတယ်" မြေမဟီကို ဇစ်ဆွဲဖွင့်တဲ့အခါ အမေဟာ ပြုံးပြုံးလေးပါပဲ ကောင်းကင်ကို သော့နဲ့ဖွင့်ပြန်တော့ မေတ္တာဟာ အေးမြနိုင်လွန်းပါတယ် အမေရယ် တုနှိုင်းမဲ့ မေတ္တာရှင်ကြီးရယ် တစ်ခုမှမလုပ်ပေးနိုင်ခဲ့တဲ့ တစ်ခုတည်းသော လုပ်နိုင်ခြင်းက သတိရခြင်းပါအမေ။ ဆိုပါစို့ ။ အမေစုသာ တိမ်းပါးသွားခဲ့မယ်ဆိုရင် ချောင်ထဲကထလာတဲ့ ကဗျာဆရာတွေက ဒီလိုကဗျာတွေရေးပြီး အမေ့ကို ဂုဏ်ပြုကြလိမ့်မယ်။ မောင်ချောနွယ်အမှတ်တရ၊ လှသန်းအမှတ်တရ အောင့်မေ့ဖွယ်အခမ်းအနားတွေမှာ အရက်တွေမူးပြီး အမေ့ကိုသတိရတဲ့ ကဗျာတွေ ရွတ်ကြလိမ့်မယ်။ အရက်မူးမူးနဲ့ အမေ့ကို သတိတရ ဝမ်းနည်းပူဆွေးနေကြလိမ့်မယ်။ ကဗျာဆရာသမဂ္ဂက မြို့တော်ခန်းမရှေ့မှာ အမေကဗျာတွေ ရွတ်ကြလိမ့်မယ် ။ နှစ်စဉ်နှစ်တိုင်း ရွတ်ကြလိမ့်မယ် ။ " အို မာတာမိခင် ...။ ချစ်လို့မဝနိုင်သေးတဲ့ တို့မေမေရေ...။ ကံတရားကိုပဲ အပြစ်ပုံရမလား ။ အမေ့ရဲ့ သံသရာခရီးလမ်းကြောင့်လားလို့ ၊ အတွေးမဆုံးခင်မှာပဲ ဝေးကွာခဲ့ရတဲ့ ချစ်မေမေရေ ....။ " ဆိုသလိုမျိုး ဇာတ်မင်းသားလေးတွေက ဇာတ်ကနေရင်း သူတို့အမေကိုပြောသလိုလို ၊ ဇာတ်လမ်းအရလိုလို ၊ အမေစုကိုပဲ သွယ်ဝိုက်ပြောသလိုလိုနဲ့ ဇာတ်ကနေရင်း ပြောကြလိမ့်မယ်။ အောက်ကပရိတ်သတ်တွေက အမေစုကိုပြောတယ်ထင်ပြီး လက်ခုပ်လက်ဝါးတွေ အားရပါးရ တီးကြလိမ့်မယ် ။ ငွေစက္ကူတွေ အထပ်လိုက် ဆုချကြလိမ့်မယ် ၊ သတ္တိရှိတဲ့ ဇာတ်မင်းသားလေးဆိုပြီး။ " အာဏာသိမ်းထားချိန်တုန်းက ရုပ်ရှင်ရိုက်ခဲ့တာက အမေစုလွတ်မြောက်ဖို့ လှုပ်ရှားနေတဲ့ အဖွဲ့တွေကို တိုးတိုးတိတ်တိတ် အကူအညီပေးဖို့ ရုပ်ရှင်ရိုက်ခဲ့ရတာပါ " ဆိုပြီး ရုပ်ရှင်သရုပ်ဆောင်အချို့က ရွှီး ရွှမ်းကြလိမ့်မယ်။ " ဒေါ်အောင်ဆန်းစုကြည်က ပေါက်စီတစ်လုံးကို တစ်ခြမ်းစားပြီး ၊ ကျန်တာလေးကို စက္ကူလေးနဲ့ပတ်ပြီး ရေခဲသေတ္တာထဲမှာ ပြန်ထည့်တာဗျ ။ အဲ့ဒီလို ခေါင်းဆောင်နော် " ဆိုပြီး အာဏာသိမ်းကာလမှာ အိပ်ပျော်နေတဲ့ စာရေးဆရာ၊ ဆရာမတချို့က စာပေဟောပြောပွဲတွေမှာ လက်ခုပ်သံတွေ ချူကြလိမ့်မယ်။ " စီဒီအမ်မလုပ်ပေမဲ့ အမေစုကိုတော့ ကျွန်မက အမေရင်းလို ရင်ထဲက လေးစားပြီးသားပါ။ အခုလို အမေစု နှစ်ပတ်လည်နေ့မှာ ကျွန်မ မျက်ရည်ကျမိပါတယ် ။ အမေစုသာ ရှိနေဉီးမယ်ဆိုရင် လက်နှစ်ဖျာမိုးပြီး ရှိခိုးဉီးချမိမှာပါရှင် " ဆိုပြီး နန်းစီဒီအမ်အချို့က အလုပ်မပြုတ်အောင် လိမ်လည်ကြလိမ့်မယ်။ " ကျွန်တော့်သူငယ်ချင်းအရင်းက PDF ထဲ ရောက်သွားတယ်။ ကျွန်တော်လိုက်ဖို့ပြင်တော့ အဖေသိသွားပြီး နှလုံးရောဂါထလာတယ်။ အဲ့ဒါနဲ့ ကျွန်တော် မလိုက်ဖြစ်ခဲ့ဘူး။ တိုက်ပွဲမှာ ကျွန်တော့်သူငယ်ချင်း ကျသွားတယ်လို့ အွန်လိုင်းပေါ်မှာ တွေ့ရတဲ့နေ့က ကျွန်တော် ချုံးပွဲချ ငိုတော့တာပါဗျာ။ ဘဝမှာ အဲ့ဒီလို တစ်ခါမှ မငိုခဲ့ဖူးဘူး။ အခုလို လူထုခေါင်းဆောင် ဒေါ်အောင်ဆန်းစုကြည်ရဲ့ အမှတ်တရနေ့ဆိုတော့ ဒုတိယအမေလို ချစ်ခဲ့ရတဲ့ အမေစုကိုလည်း သတိရမိသလို၊ သူရဲကောင်း ကျွန်တော့်သူငယ်ချင်းကိုလည်း အလေးပြုချင်လို့ ဒီအခမ်းအနားကို ရောက်လာတာပါ။" ဆိုပြီး အာဏာသိမ်းခေတ်မှာ ဘောလုံးပွဲလောင်းနေတဲ့ လူငယ်တချို့က အင်္ဂုလိ လုပ်ကြလိမ့်မယ်။ " အမေစုနဲ့ တွဲရိုက်ထားတဲ့ပုံလေး ကျွန်တော့်မှာရှိတယ်။ အခြေအနေအရ ခံဝန်ထိုးရပေမဲ့ အမေစုအပေါ်မှာတော့ ကျွန်တော့်ချစ်ခင် လေးစားစိတ်က ပျက်မသွားဘူး။ တုနှိုင်းမဲ့ ရဲဘော်ရဲဘက် မေတ္တာရှင်ကြီးပါဗျာ။ အစားထိုးလို့မရပါဘူး။ သိပ်ကို နှမျောမိပါတယ် " ဆိုပြီး သာကူး ပင်နီအချို့က ပွဲလည်လာကြလိမ့်မယ်။ အမေပြခဲ့တဲ့လမ်းက ဒီမိုကရေစီ လျှောက်ကြမယ် တူတူရှေ့ဆီ ငါတို့က တွဲလက်ညီညီ မင်းတို့က တေးတွေဖွဲ့သီ ဂုဏ်ပြုဖို့ လာခဲ့ကြပါ ငပလီ ဆိုပြီး ဟစ်ဟော့ အဆိုတော်တွေက ကြောင်တောင်ကျားတား အဝတ်အစားဝတ်ထားတဲ့ မျိုးဆက်သစ်လေးတွေကို စင်ပေါ်ကနေ ဆိုပြလိမ့်မယ် ။ သိပ်ကို သတ္တိရှိတဲ့ ကောင်လေးဆိုပြီး ပြည်သူတွေက ချီးကြူးကြလိမ့်မယ် ။ အမေစုအလွန် ဗလာဗလာတွေကို ကျွန်တော်ကတော့ အသိအမှတ်ပြုမှာမဟုတ်ဘူး ။ အမေစု အသက်ရှင်နေသေးတယ် ။ အချိန်မီသေးတယ် ။ ရဲစိတ်ကိုပြဖို့ အခွင့်အရေးရှိနေသေးတယ် ။ အမေစုဟာ မြန်မာ့အနာဂတ်အတွက် သိပ်ကို အရေးကြီးတဲ့ ခေါင်းဆောင်တစ်ယောက်ဖြစ်တယ်။ အမေစုဟာ ဒီတိုက်ပွဲကို တိုက်နိုင်တဲ့သူမဟုတ်ဘူးဆိုတာ ကျွန်တော်သိတယ် ။ အမေစုဟာ ကျွန်တော်တို့အားလုံးရဲ့ ခေါင်းဆောင်ကောင်း။ စံပြပုဂ္ဂိုလ်တစ်ယောက်ဖြစ်တယ် ။ ဒီခေါင်းဆောင် သက်ရှိထင်ရှားရှိနေချိန်မှာ ပြရဲတဲ့ သတ္တိကို ကျွန်တော်တို့လိုလားကြတယ် ။ ဒီခေါင်းဆောင်လွန်ပြီးမှ ဒီခေါင်းဆောင်နဲ့ပတ်သက်ပြီး ပေါ်လာမယ့် ကဗျာ၊ ရုပ်ရှင်၊ ဂီတ၊ သုခုမ၊ ပန်းချီ ၊ ပန်းပု၊ ဟောပြောပွဲ ၊ အခမ်းအနား ဘာတစ်ခုမှ မလာနဲ့လို့ ကြိုတင်အသိပေးချင်ပါတယ် ။ ပုံက AI ကထုတ်ပေးထားတာပါ AI သိတဲ့အမေစုရဲ့ကျန်းမာရေး အခြေနေနဲ့ လုပ်ထားတဲ့ပုံပါ။ crd:ဘကြီးအောင် LA 7 September,2025 - @no.91220