Fikir waa halka wax walba ay ka bilowdaan. Qof walba wuxuu leeyahay fikrado maskaxdiisa ku wareegaya, mararka qaarna waxay u muuqdaan kuwo yaryar oo aan qiimo badan lahayn. Laakiin haddii fikirkaasi la dayaco ama aan la dhaqan gelin, wuxuu ahaanayaa halkaa oo keliya — fikir aan nolol u yeelan. Sida dhagax qaaliga ah oo aan la jarin, fikirka aan dadaal la socon waa hanti aan la isticmaalin. Marka la eego dhinaca kale, Dadaal la’aanta waa sababta ugu weyn ee fikrado badan ay ku lumeen. Dad badan ayaa leh fikrado waaweyn, laakiin cabsi, caajis, ama doonis la’aan waxay ka hor istaagtaa inay talaabo qaadaan. Qofka oo keliya fikirka ku ekaadaa wuxuu ku dhammaanayaa riyooyin aan rumoobin iyo mustaqbal uu mar walba ku qoomameeyo, isagoo is weydiinaya waxa dhici lahaa haddii uu ku dhaqaaqi lahaa. Laakiin marka aad ku darto Dadaal, wax walba ayaa is beddela. Dadaalku waa buundada kaa gudbisa fikirka iyo natiijada. Wuxuu kaa caawiyaa inaad adkaysato, xitaa marka caqabado iyo fashilo kugu soo wajahaan. Fashilka laftiisa wuxuu noqdaa cashar, dadaalka joogtadana wuxuu noqdaa dariiqii guusha. Dadka guuleysta ee aad ku dayato maanta, dhammaantood waxay lahaayeen hal shay oo isku mid ah: dadaal aan kala go’ lahayn. Ugu dambeyn, dadaalkaas ayaa ku gaarsiiya Natiijo. Natiijadu waa miraha fikirkaaga iyo shaqadaada adag. Waa xilliga aad aragto dhirta yar ee aad beeratay oo ubax noqotay, ama hamigii aad ku riyoon jirtay oo dhab noqday. Natiijadaadu mar walba waxay noqoneysaa dhiiragelin cusub, adigoo mar kale fikiraya, dadaalaya, kuna guuleysanaya wax ka weyn wixii hore. Sidaa darteed, ha ku ekaanin fikir, hana ku qancin riyo. Talaabo qaad, dadaal geli, maxaa yeelay natiijadu waxay sugaysaa qofkii geesinimada u yeesha inuu socdo. - @abdulsalamsanei