Кеген ауылындағы арканың философиялық талдамасы Кеген аркасы – Тағзым мен ТалпыныстыңТаңбасы  Кеген ауданының кіре беріс қақпасы – тек сәулеттік құрылым ғана емес, ол – далалық болмыс пен биік рухтың көркем поэмасы. Бұл қақпа – табиғатпен тілдескен, тарихпен тағдырласқан, болашақпен үндескен киелі кеңістіктің белгісі. Таудың баурайындағы бұл мекен өзінің тынысын да, тінін де осы қақпа арқылы паш етеді. Әрбір тік сызық, әрбір өрнек пен пішін терең ойдан, ұлт жадысынан туған. 1. Шаншылған шыңдар – биік рухтың белгісі  Қақпаның көкке шаншыла көтерілген сұлбасы – Хан - Тәңірінің асқақ бейнесі. Ол тек табиғи пішін емес, бұл – рухтың асқақтығы, ел арманының биігі, ұлттың еңсесі. Тауға қараған адам армандауға, көтерілуге, жаңаруға ұмтылады. Кеген – таулардың төріндегі ел, ал бұл қақпа – сол армандарға апарар рухани баспалдақ. 2. Тайқазан мен ошақ – өмір өзегінің символы  Қақпаның екі шетінде үш бұтты ошақ үстінде қазан бейнеленген. Бұл – қазақтың бар болмысының өзегі. Қазан – құттың, берекенің, ынтымақтың белгісі. Үш бұт – өткеннің ізі, бүгіннің іргесі, болашақтың үміті. Ол – ата-бабаның аманаты, ананың алақаны, баланың болашағы. Бұл – қайнаған өмірдің, жалғасқан ұрпақтың, мәңгілік елдің көркем коды. 3. Батыр тұлғасы – елдіктің елшісі  Қақпа төріндегі абстрактылы батыр бейнесі – намыстың найзасындай. Ол – көзге көрінген күзетші, рухқа сезілген тірек. Бұл бейне халқымыздың жауынгерлік рухын, батырлар елінің бекзат болмысын бейнелейді. Батыр – ел шебін күзетіп тұр. Әр өтіп бара жатқан жан сол тұлғаға көз тастап, жүректегі жігерін оятсын деген ниетпен. 4. Тәж киген таулар – мәртебе мен мұраттың тұмары  Қақпаның дәл ортасындағы логотип пен тауға ұқсас тігінен тізілген құрылымдар – тәж іспетті. Бұл – Кегеннің мәртебесі. Таудың тәж болуы – табиғат пен халықтың үйлесім табуы. Ол – елдің айбыны, найзаның ұшындай серт. Бұл биіктік – өрлікке, ұрпақты ұлы мұраттарғабастайды. 5. Модерн мен дәстүрдің үндестігі  Қақпа – тек құрылыс емес, ол – уақытпен үндескен өнер. Модерн мен ұлттық нақышты үйлестірген бұл шешім – дәстүрден тамыр тартып, болашаққа бағыт алған сәулеттік тіл. Металл мен өрнек, жарық пен көлеңке – барлығы да бүгіннің рухымен, кешегінің үнімен сөйлейді.  "Кеген – шыңы бұлт құшқан таулар елі ғана емес, жүрегі отты, рухы биік, тарихы терең елдіктің мәңгілік шекарасы." - @zhaks_nus