⁨ تلاقيت مع روحي و انا صغيرة بالكافيتيريا هي جات متأخرة مع ختها الكبيرة و انا جيت مع وليدي ، بصح في زوج لحقنا روطار برك هي جات فالطرولي و انا جيت فالطونوبيل … هي طلبت حليب وحدو و انا طلبت حليب بالقهوة … هي جات بلا ماكياج و انا جيت بلا ماكياج 😅 شافتني و بكات قاتلي ياه مزالكي تشبهيلي بصح تبدلتي بزاف … قاتلي ولينا مشهورين كيما كنا حابين ؟ ضحكت و قلتلها وي و ولات الناس تعرفنا و تحبنا ❤️ قاتلي ولينا مغنيات مشهورات و شاركنا في كاش مسابقة ؟ قلتلها لالا دارنا ما خلاوناش نغنوا و كان عندهم الحق قالتي مزالنا نشوفوا البارصا و الريال في دار ماني مع بابا (جدي ) ؟ قلتلها لالا بابا مات الله يرحمو و حتى الفوت ما زدناش تبعناه … قاتلي تزوجنا و درنا عايلة ؟ قلتلها وي تزوجنا و درنا عايلة و جبنا احلى دندون 😍 قالتي و مزال يحڤرونا و يتنمروا علينا و ما يخلوناش نمدوا راينا ؟ قلتلها لالا هاديك بكري ، درك راينا ولا مسموع و ماكاش لي يحڤرنا و لي يغلط يخلص قاتلي مزالنا نحشموا نعنقوا پاپا و نخافوا منوا ؟ قلتلها لالا كبرنا و فهمنا بلي پاپا حنين بزاف و يحبنا و يموت علينا برك ما كانش يعرف يعبر قاتلي مازلهم يضحكوا علينا كي حنا رقاق ؟ ضحكت و قلتلها يا حصراه كبرنا و زينا و سمنا و ولاو يتشهاو فينا قاتلي مزال البنات يدوروا علينا و ما يخلوناش نلعبوا معاهم ؟؟ قلتلها لالا البنات صفيناهم و بقاو غير لي يحبونا و نحبوهم ❤️ قاتلي مزالنا نبكوا و نضحكوا بلا سبة ؟ قلتلها لا لا كبرنا و فهمنا بلي ما كناش نبكوا و نضحكوا بلا سبة كنا نبكوا على خاطر ما كانوش يفهمونا و كنا نضحكوا باش ننساو همومنا قاتلي ومازلنا المفششين تاع الدار ؟ قلتلها وي مزالنا و عندنا احلى اخوات لي يحبونا و يخافوا علينا و فهمنا بلي هوما الصح في هاد الدنيا عنقتها و قلتلها ، تشفاي كيما وعدتك بلي يجي النهار لي نشريلك كامل واش تحبي و حاجة ما نخليها في خاطرك و نخليك فرحانة و كامل الناس تحبك ان شاء الله نكون وفيت بوعدي… و اليوم ولا عندنا 32 سنة و رانا في نصف مشوارنا و مزال عندنا طريق طويلة … نحبك زهيدة ❤️ #gemini #trendingvideo #geminitrend #الجزائر #childhoodmemories - @zahidahorr