الليالي الفاطمية _ إستشهاد أمنا الزهراء عليها السلام ما بيه حيل فراگ _ الشاعر كرار حسين الكربلائي الرادود محمد الجنامي عن عيني لو ردتي تروحين ... وين أنطي وجهي يا أم الحسين ؟! تدرين الچ أشتاگ ... ما بيه حيل فراگ ___________________ ذبلانه أشوفچ يالحنينه وخافت الصوت كلشي ولا تگليلي حضر ليّه تابوت يالزهرة والزهرة علي من بعدچ يموت هدّت على الخد دمعتي وتصيح الجروح المن تظل بدنيتك لو فاطمة تروح بعدچ تظل سلوة حياتي الآه والنوح عوفي الرحيل وظلّي وياي ... لو رحتي ما ترحمني دنياي اعليچ الحزن ما لاگ ... ما بيّه حيل فراگ ___________________ اگبالچ أضم دمعي اليصب وبحرگه ناديت ما بيچ غير العافية يا شمعة البيت بعدچ شسوي بعمري لو بالدنية ظليت دنياي خوف وروحي محتاجه الأمانچ يم الحنان ولا تحرمينه حنانچ باچر أموتن لو شفت خالي مكانچ گومي على طولچ يالحبيبه ... بعدچ علي يطوّل نحيبه عايش بديره أشواگ ... ما بيّه حيل فراگ ___________________ صدي عليه وعوفي بالله طاري الوداع وشوفي دمعتي الخضّرت شيبات بالگاع عافيتچ بروحي أشتريها لوّن تنباع باچر تگومين بسلامة وننسه الدموع يا فاطمة يطيب المتن وتطيب الضلوع للفرحة مو للوحشة باچر نعلگ شموع توه العمر بادي وبعدنه ... ردنه سوة نكبّر ولدنه بروحي جمر حراگ ... ما بيّه حيل فراگ ___________________ أعليمن يا بعد أهلي أشوفچ گوة تحچين شو ناسية كسر الضلع وإعليه تبچين يالزهرة مو چنه سوة والعيش محلاه والله علي كل حيله ينهد من تموتين يالزهرة مو چنه سوة والعيش محلاه عالدفع بابچ والظلمنه حسبي الله خلّانة نتوادع وداع الموت والآه يا فرحة ما مقسومة إليّه ... أخفي الحزن والبيّه بيّه طعم الألم ينضاگ ... ما بيّه حيل فراگ ___________________ يا زهرة الدنية بغيابچ يظلم الكون وطبع اليودّعله حبيب يعيش محزون يكتم شعوره بس تفضحه دموع العيون يا ما تقسامنه الألم يا ما صبرنه بليل وضحى وسفة انتهت عشرة عمرنه أمر الله هذا ولله سلّمنه أمرنه شگد صعبه من تموت الأعزاز ... وبأغلى ناسك تمشي جنّاز من عيني حلمي نباگ ... ما بيّه حيل فراگ عظم الله أجورنا وأجوركم بذكرى إستشهاد الصديقة الكبرى أمنا فاطمة الزهراء عليها السلام ٨ ربيع الثاني (الرواية الأولى ٤٠ يوم) #ابوفاطمةالغزي #ابو_فاطمة_الغزي_٧٦ #عماد_سامي_الغزي - @emadsami76