"Miidhaginni Ayyaana irreechaa irratti mul'ate Oromootti ulfina kan horu, saboota biroo kan gammachiisuufi hariiroo uummattoota keenyaa kan jabeessudha!" Abbaa Gadaa Goobaana Hoolaa = = = Haala kabaja Irreecha Hora Harsadee Bara 2018 ilaalchisee Abbaan Gadaa Goobana Hoolaafi Hooggantuun Biiroo Aadaafi Tuurizimii Oromiyaa ibsa miidiyaaleef kennaniiru. Abbaan Gadaa Goobanaa Hoolaa qaamolee Irreechi baranaaa duudhaa isaa eegee karaa nagaan akka kabajamuuf ga'ee isaanii ba'an hunda galateeffataniiru. Miidhaginni Ayyaana irreechaa irratti mul'ate uummata Oromootti ulfina kan horu, saboota biroo kan gammachiisuufi hariiroo uummattoota biyya keenyaa jabeessuu bira darbee hawwattummaan Irreechaa daraan dabaluu ibsaniiru. Uummanni Oromoo baatii Fulbaanaa keessa jila guddaa waan qabuuf kallattii hundaan Irreecha kabajuuf dhufuu kaasuun, Irreecha baranaa kabajuuf Keeniyaa, Jubuutiifi Ugaandaa irraa argamuu himaniiru. Uummanni Biyya alaa biyya keenya Itoophiyaa gaafa dhufan Oromiyaa guddoo waan arganii ayyaana guddaafi kabajamaa kana irratti argamuu isaaniif galateeffataniiru. Kana malees Irreechi aadaa Oromooti malee Amantaa miti kan jedha Abbaan Gadaa Goobana Hoolaa Oromoon Gadaa Gadaan akka dabasruufi, ilma abbaan akka dabarsu himuun, Irreecha kana dhaloota dhalootatti haalaan miidhaksinee dabarsuun murteessaa ta'uu hubachiisaniiru. Irreecha waggoota hedduuf Oromoon ittiin dararamaa ture, yeroo ammaa kana ulfina barbaachisu argachuun qe'een kun bakka argatee miidhaagee dhaloota simachaa jiraachuu ibsaniiru Uummanni keenya saba jaalataa, haammataa, obsa qabuufi saba gadaa uummatee sirna mataa isaa bocatee ittiin bulaa tureefi saboota biraa ofitti qabee kabaja maluuf laatu ta'uu kaasaaniiru Irreechi bara 2018 karaa duudhaa isaa eegee akka kabajamu gochuu keessatti qoodni Mootummaa Naannoo Oromiyaa guddaa ta'uu kaasuun, qaamolee nageenyaa sadarkaan jiraniifi hirmaattota ayyaana Irreechaa galateeffataniiru. Hooggantuun Biiroo Aadaaf Turizimii Oromiyaa Aadde Jamiilaa Simbiruu gama isaaniin ergaa galataa dabarsaniin, uummanni bal'aan, sabaaf sablammootafi lammiilee biyyaa alaa Ayyaana Irreechaa bara2018 irratti hirmaatan hunduu Irreechi Hora Harsadee karaa duudhaa isaa eeggateen xumuramuu isaatin baga gammaddan jedhaniiru. Ayyaanni Irreechaa bara kanaa karaa hawwatummaa turizimiitin dabalameen dirree misoome irratti karaa adda ta'eefi duudhaa isaa eeggateen kabajamee xumuramuu kan ibsan Adde Jamiilan, Irreechi bara kanaa wayita kabajamu garaa garummaa amantaafi siyaasaa tokko malee tokkummaafi walooman kabajamuun xumuramuu guddummaa biyya keenyaa kan agarsiisu ta'uus ibsaniiru. Qaamoleen keessummaa Irreechaa simachuun jalaalaafi antummaan simachaa turaniif galata galchuun Qaamolee garaa garaa milkaa'ina Ayyaana Irreechaatif tumsa taasisanis galateeffataniiru. Dhaabbilee hirmaattota Ayyaanichaatif tajaajila garaa garaa kanneen akka qaamolee nageenyaa, dhaabbilee fayyaa, miidiyaaleefi jiraattota Magaalaa Bishooftuufi Magaalaa Finfinnee galateeffataniiru. #ኢትዮጵያ_ለዘለዓለም_ትኑር🇪🇹🇪🇹🇪🇹🇪🇹 - @shimellis.abdisa