@fatmaokeel73: راجع نفسك قبل ما يعدي العمر وقبل ما توصل للنهاية وتلاقي نفسك راجع من الرحلة بلا زاد، قضيت سنين بتجري ورا الدنيا، ونسيت إن اللي هيبقى منك مش نجاحك، ولا فلوسك، ولا ممتلكاتك اللي جمعتها أو سيبتها ميراث لغيرك، اللي هيبقى هو سيرتك… هي الكلمة اللي الناس هتقولها لما يُذكر اسمك، هي الدعوة اللي تطلع من قلب صادق في غيابك، أو الحسرة اللي تتهامس بيها النفوس لما يفتكروك، أو الدعوة عليك اللي تكون تفويض من القلوب المجروحة، كل ما تيجي سيرتك يفتكروك بيها، ناس تسامح، وناس ما قدرتش، وفي لحظة ضعف أو وجع، دعاؤهم يحاصرك، وقت لا تقدر تعتذر فيه، ولا ترد حق، ولا تطلب مسامحة. في ناس لما تُذكر، الكل يبتسم ويقول: “دول ناس طيبة وأصلهم طيب”، وفي ناس تانية، لما يُذكر اسمهم، تسكت القلوب قبل الألسنة، مش كرهًا، لكن وجعًا من تصرف، أو كلمة كسرت خاطر، أو حق اتاخد، أو مواقف اتقلبت من الحق للباطل، وسابِت وراها وجيعة مش بالكلام تتنسى. السيرة عمرها أطول من العمر، هي اللي بتعيش لما كل شيء يختفي — المنصب، المال، وحتى وجودك نفسه. فخلي سيرتك طيبة، وأثرك جبر، وخلي الناس تذكرك بخير وتذكرك بدعوة ، مش لأنك كنت بلا خطأ، لكن لأنك كنت صادقًا في نيتك، رحيمًا في تعاملك، طيب الأثر في حضورك وغيابك. ولا تكابر وتتكبّر… راجع نفسك، ما تسمعش غير صوت ضميرك، واجه أخطائك وتقصيرك، وطول ما في وقت، عندك فرصة تصلّح وتتصلّح مع سيرتك اللي هتسيبها بعدك. دي السيرة اللي هتكون زادك في الدنيا، وإن صلحت… كانت زادك اللي ينجيك في الآخرة. اللهم اجعل ذكرنا طيبًا، وسيرتنا نورًا، وأثرنا جبرًا بعد الرحيل، واجعلنا ممن تُنادى وجوههم يوم القيامة: ﴿ادخلوا الجنة بما كنتم تعملون﴾ #راجع_نفسك #السيرة_الطيبة #أثر_يبقى فاطمة عقيل
