Mar kasta oo aan isku dayo inaan ka fikiro qof aan adiga ahayn, qalbigeygu wuu diidaa. Naftaydu waxay garanaysaa hal magac oo keliya, waxay baratay hal qof oo keliya, waxayna aqbashay hal jacayl oo keliya waana adiga jacaylkaaga Qof kale kuma beddeli karo booska aad ku leedahay maskaxdayda, xusuustayda, iyo nafteenna gaarka ah ee aan adiga darteed u nooshahay. Waxaad i bartay wax aanan horay u aqoon: sida qof loo jeclaado si qoto dheer, sida qof loo dareensiiyaa qiimaha uu leeyahay, sida qof loogu dhoola-caddeeyo iyadoo ilmadu weli ku jirto. Markii aad timid nolosheyda, qalbigeyga wuxuu joojiyay inuu raadiyo qof kale waayo wuxuu helay qof uu ku nasto. Ballamaha aynu wada samaynay kuwa qarsoon, kuwa la sheegay, kuwa qalbiyadu is fahmeen waxay ii yihiin dhaarta aan ka qasaaro aduun iyo aakhiro toona. Geeri mooyaane, cidna kama hor istaagi karto inaan oofiyo ballan kasta oo adiga kugu saabsan. Waxaan u dhashay inaan kuu ahaado qof daacad ah, qof kuu qalma, qof ku ilaaliya sida qof uu u ilaaliyo wax uu ku faanayo ama uu jecelyahay. Markaan xusuusto sida aad u tahay qof farxad u ah nolosheyda, waxaan dareemaa in jacaylkeenna uu yahay sheeko aan ku qornayn buug, balse ku qoran laabteenna. Sheeko noqotay badweyn ay hirar farxad leh ku socdaan. Haddii duruufuhu is rogaan, haddii adduunku is beddelo, hal shay oo keliya ma is beddeli doono waana jacaylka aan kuu hayo, oo aan ahayn mid maanta bilowday ama berri dhamaanaya, balse wa mid muddo dheer ku dhismay, kuna fiday gudaha durugsan ee qalbigayga. Maalintii aan ku bartay waxay ahayd maalintii uu iftiin cusub ii baxay. Waxay ahayd sida in qalbigeyga laga furay albaab xiran, oo gudihiisa laga shiday nal aan weligii bakhtin. Farxaddayda maanta lama dhalan shalay waa adiga oo gimid oo beddelayna dhammaan wixii mugdi ahaa ee hore. Barashadaadu waxay ii bilowday maalmihii ugu quruxda badnaa ee noloshayda aan arko. Waxaan helay sabab aan u sii jeclaysto maalin walba, sabab aan u sii furo indhahayga subax kasta, sabab aan u rumaysto jacayl daacad ah oo hadana dhab ah. Adiga dartaa ayaan u bartay in qof la jeclaado ay tahay daawo, ay tahay hoy, ay tahay nolol macaan. Haddii aan ku qoro buug, eray kasta oo aan geliyo ma gaari doono qoto dheerida jacaylka aan kuu hayo. Haddii aan kuu sawiro, midab walba oo aan isticmaalo wuu yaraanayaa, waayo midabka jacaylka aan kuu hayo waa mid aan dunida laga helayn lagana heli doonin. Waxaan ku rajeeynayaa in aan ku weheliyo safar kasta oo nolosha ah, farxad kasta oo timaada,murugo kasta oo timaadda, iyo riyo kasta oo aynu wada wadaagno. Qalbigaagu waa gurigayga, joogitaankagu waa farxaddeyda, adiga ayaana ah qofka aan jeclahay jeclaana doono inta aan aduunka joogo❤️ - @omarrr411