@mohammad19581: الحمام زمان قبل عصر السخان .. .😂 وإحنا صغيرين كنا بنكره الحموم ليه ؟؟ لإن أمهاتنا الله يبارك فيهم كانوا بيعذبونا لما نستحمى أول ما تقول بصوت أشبه بصوت ريا وسكينة ( يلا ع الحمام ) وكان لازم يوم الجمعة سواء صيف او شتا 😮 طبعا الحمام بالدور الكبير قبل الصغير ولما أسمع أخويا الكبير بيستغيث ويبكي وهي بتحميه وأنا في الأوضة منتظر دوري لتنفيذ الحكم وانا برتعش من الخوف 🤐.. من هنا تبدأ رحلة العذاب 😫 تقليع الهدوم 🙆 وهي بتقلعني تحس إنها بتنتّف ريش ديك رومي😌 وودني كل واحدة بتروح ف ناحية تبقي شبه جناحات الطيارة ✈️✈️ وحظك بقي لما تبقي دماغك أكبر من هدومك دي قصه تانية خالص 😲 وطول ما أنا بستحمى قاعد مقرفص. 🚼 طيب يا حاجة رجليّ وجّعتني تزغدني وتقول لي إقفل بؤك 🙊 بالنسبه للميّة لازم تكون تحت درجة الغليا♨ يا أُمي لحمي داب !! بيجي الزغد الثاني 👀 لما تدعك راسي كأنها بتدعك مصباح علاء الدين عشان يطلّع المارد🙏🌪 وراسي تروح يمين وشمال تحس إن فيه زلزال 🚫 والمشكلة لما ينزل الصابون على وشك وهي بتشيله تلخبط ملامح وشك ..غير حرقان العينين تقول لك إقفل عينيك عشان الصابون ميخشش فيهم بس بعد ايه بقي لما عينيك تتملي رغاوي كأنهم إزازة كوكاكولا بتفور 😰😨 المشكلة إن الصابونة أجمد من الحجر لما تدعك بيها جسمي كأنها حجر تجليخ 😤😤 كان صابون نابلسي أفخر أنواع الصابون في عصرنا آنذاك (قبل اختراع الشامبوهات) نيجي بقى لما تمسك مناخيرك🤥 وتقولك ( نفففففف )😪 وأنِف من ودني .. لأنه كل فتحات التنفس مقفولة فقرة التلييف 😤 بتمسك الليفة وبتفركها ف الصابونة تحس إن جزار بيسن سكاكينه للدبح 🔪 وإلا فركها للجسم إهدِي شوية يا حاجة أنا حاسس إنك بتبشري جبنة🧀 فقرة التنشيف😬 تمسك الفوطة وتفرك بيها جسمك كله في رأسي بأحس أن شعري بيطلع ف الفوطة 😳 ولازم جسمي يبقى لونه أحمر وإلا تعيد التنشيف😟 بعد الحمام تطلع تبص على نفسك في المراية والبخار طالع من جسمك كأنك حلة بُخار 😩 صوابعي مش حاسس بيها ولون الجسم أبيض وأحمر من كثر الدعك 😢 تلبيس الهدوم 😲 راسك قد رقبة التيشرت خمس مرات وعايزة تدخلها بالعافية بتلبس أول تيشيرت وثاني تيشيرت..👕 ويا ويلك لو الكم فلت منك تقولك ( إقفل كمّك عشان تلبس الزفت الثاني ) نيجي لتسريح الشعر 🙇 وحفاظا على تنظيف الراس من الشوائب .. بتغرز المشط ف راسك كأنها بتحرت الأرض وطبعاً في احتمال إن أسنان المشط توصل لمخك والمصيبة بقى لو كانت فلاية 😂😂 إللي هايضحك أكيد مجرب😹😍 مساء البسمة والسعادة لقلوبكم الجميلة ✍️ محمد 😊
