ကောသလမင်းအိပ်မက်(၁၆)ချက် ================== ကောသလမင်း၊ အိပ်မက်ခင်း၊ ညဉ့်တွင်း(၁၆)ဖြာ။ လောကသနင်း၊ တရားမင်း၊ ရှင်းလင်းဟောပြရှာ။ သာသနာတော်၊ နှစ်ထောင်ကျော်၊ နောင်သော်ရောက်သောခါ။ တရားကင်းကြ၊ မင်းပါပ၊ မုချအုပ်စိုးမှာ။ ထိုမင်းလက်ထက်၊ သင့်အိပ်မက်၊ မပျက်ပေါ်ထွက်မှာ။ ။ (၁) နွားနက်လေးကောင်၊ ဝှေ့မည်ယောင်၊ တိမ်းရှောင်ထွက်ပြေးသည်။ လေးဘက်ညိုရောင်၊ မိုးတိမ်တောင်၊ ရွာယောင်ကွင်းလိမ့်မည်။ (၂) တထွာ,တတောင်မျှ၊ သစ်ချုံက၊ ပွင့်ကြသီးကြသည်။ ကညာပျိုမ၊ ဣတ္ထိယ၊ ငယ်ကအိမ်ထောင်မည်။ (၃) နွားငယ်မနို့၊ နွားကြီးတို့၊ စို့လို့မြင်မက်သည်။ ကျေးဇူးကြီးလှ၊ မိနှင့်ဖ၊ သားကဝေကျွေးမည်။ (၄) နွားကြီးကိုပယ်၊ က,နွားငယ်၊ ၀န်မယ်မရုန်းသည်။ လူကြီးကိုပယ်ရှား၊ လူငယ်များ၊ မြှောက်စားနိုင်ငံပြည်။ (၅) ခံတွင်းနှစ်ပေါက်၊ မြင်းစားသောက်၊ မလောက်မြင်မက်သည်။ လာဘ်နှစ်ဘက်စား၊ မှူးမတ်များ၊ တရားစီရင်မည်။ (၆) မြေခွေးအိုထံ၊ ရွှေခွက်နှံ၊ စွန့်ပြန်ကျင်ငယ်ရည်။ မိန်းမမြတ်မှာ၊ လူမိစ္ဆာ၊ အိမ်ရာထောင်လိမ့်မည်။ (၇) သားရေလွန်းကား၊ ခြေရင်းထား၊ ပုံစားခွေးငတ်မှီ။ လင်မသိအောင်၊ ပစ္စည်းဆောင်၊ လင်မြှောင်ကျွေးလိမ့်မည်။ (၈) ရေပြည့်အိုးကြီး၊ ထပ်လောင်းမှီး၊ ချည်းနှီးအိုးငယ်တည်။ မင်းဘဏ္ဍာသာ၊ တိုးအောင်ရှာ၊ မြို့ရွာနာလိမ့်မည်။ (၉) ရေကန်ကြီးငယ်၊ နောက်အလယ်၊ နား၀ယ်ကြည်လှသည်။ မြို့အလယ်တွင်၊ ပွေရှုပ်အင်၊ မြို့ပြင်စည်ကားမည်။ (၁၀) ထမင်းအိုးနှပ်၊ ပျော့မာဆတ်၊ ကျက်လတ်သုံးမျိုးတည်။ မင်းနှင့်လူများ၊ မတရား၊ ကွက်ကျားမိုးရွာမည်။ (၁၁) စန္ဒကူးကြုတ်၊ ရက်တက်ပုပ်၊ ရောင်းထုတ်၀ယ်ကြသည်။ တရားဟောခါ၊ ပစ္စည်းရှာ၊ မြို့ရွာလယ်လိမ့်မည်။ (၁၂) ချည်းနှီးဗူးတောင်း၊ ရေနစ်အောင်း၊ ပေါ်ကြောင်းမြင်မက်သည်။ ပညာရှိများ၊ မကျော်ကြား၊ ရှောင်ရှားမြုပ်ကွယ်မည်။ (၁၃) ကျောက်ခဲကြီးများ၊ ရေပေါ်သွား၊ ထင်ရှားမြင်မက်သည်။ မိုက်သူပြောမှ၊ သဘောကျ၊ လောကဖြစ်လိမ့်မည်။ (၁၄) ဖားငယ်မ,က၊ မြွေဟောက်ထ၊ လိုက်ကြကိုက်စားသည်။ ကညာပျိုမော်၊ လင်အိုပေါ်၊ ငေါက်အော်နိုင်လိမ့်မည်။ (၁၅) ကျီးကိုဟင်္သာ၊ ခြံရံကာ၊ နေတာမြင်မက်သည်။ ပညာရှိများ၊ လူမိုက်အား၊ ၀ပ်တွားရလိမ့်မည်။ (၁၆) ဆိတ်က သစ်,ကျား၊ ကျွတ်ကျွတ်ဝါး၊ ကိုက်စားတတ်ကြသည်။ သူယုတ်မြင့်မြတ်၊ ပညာတတ်၊ တောရပ်ပြေးရမည်။ "သမ္မတဆယ်စောင်တွဲ" စာအုပ်မှ foto #crd #ကောသလမင်းအိပ်မက်(၁၆)ချက် စာလေးတွေဖတ်ပြီး စိတ်အကြည်ဓာတ်လေး လက်ခံရရှိပါစေ...♡︎🌾🌻 #𝐂𝐫𝐞𝐝𝐢𝐭_𝐎𝐫𝐢𝐠𝐢𝐧𝐚𝐥_𝐔𝐩𝐥𝐨𝐚𝐝𝐞r♡︎🌾🌻 #မေတ္တာဖြင့် #စာပေ #ဗဟုသုတ - @nvp991