@safaahvac2: 🛢️ زيت التكييف… هل ينمزج ويّه الفريون؟ وشنو الفائدة منه؟ استريح أخوي العزيز، خلي أصبلك چاي ونسولف شوية على زيت الضاغط ☕❄️ زيت التكييف جزء أساسي من منظومة التبريد، مو مجرد إضافة، وبدونه الضاغط ما يكدر يشتغل بشكل صحيح. الزيت ينمزج ويّه الفريون، بس مو كل الزيوت تنمزج ويّه كل أنواع الفريون، لأن كل نظام تكييف مصمَّم على نوع فريون معيّن ونوع زيت متوافق وياه. (أكلك أخوي… مو تسوي خلطة سحرية من زيوت مختلفة إذا دگّك العوز 😁) بعض الزيوت تذوب ويّه الفريون وتتحرّك داخل الدورة، وبعضها يبقى منفصل جزئياً حسب تصميم المنظومة. هالامتزاج مهم حتى الزيت يتحرّك ويّه الفريون بكل أجزاء الجهاز ويرجع للضاغط، وركّزلي زين على نقطة يرجع للضاغط. من هنا توصل لأهمية التركيب الصحيح للجهاز على مسار الزيت. فإذا كان الربط بين الوحدة الداخلية والخارجية مسافات طويلة، لنفرض أخمسطعش(15 متر ) أو أكثر، بهالحالة تصير استراحة الزيت أو مصيدة الزيت كلش مهمة، والضاغط يترحملك عليها. نكمل سالفتنا… فائدة زيت التكييف الرئيسية هي تشحيم وتبريد أجزاء الضاغط، تقليل الاحتكاك والحرارة، ومنع تآكل الأجزاء الداخلية. بخصوص التدفئة، هل يأثر الزيت؟ علمياً، الزيت نفسه ما يتغيّر سواء الجهاز يشتغل تبريد أو تدفئة، لكن اللي يختلف هو اتجاه حركة الفريون، درجات الحرارة، وطريقة توزيع الزيت داخل النظام. ولهذا إذا كان الزيت غير متوافق أو كميته قليلة، بهالحالة يضعف الأداء ومع الوقت ممكن يصير تلف بالضاغط. (شلون تعرف الزيت قليل بالجهاز؟ هاي نسولف بيها بالمنشور الجاي 😉) من الأخطاء الشائعة بزيت التكييف استخدام نوعية غير جيدة أو مواصفات مختلفة، أو استعمال زيت غير مخصّص لنوع الفريون، أو إهمال الزيت بعد معالجة ليك أو تغيير ضاغط ، تعرف شيصير اذا تغلس وما تضيف الزيت المفقود ، مثل ما قال احد الاخوة : يصخن الضاغط ولازم ابرة فولتارين وهنا صوتة تصير بي بحة لازم تنطي ساميلين شراب وبالاخير اذا ما تصلخة مغذي بطعم الزيت راح يودع.😁 ✍️ الخلاصة: الفريون يبرّد، والزيت يحمي، ونجاح أي منظومة تكييف يعتمد على انسجام الاثنين. وبس… وسلامتكم 🌹 #كعدة_سوالف_تبريدية_وچاي #الفني_صفاء_أبو_محمد https://linktr.ee/Safaa.Ac.Elec

الفني صفاء أبو محمد Safaa HVAC

Open In TikTok:

Region: IQ

Saturday 20 December 2025 17:55:09 GMT