@laith.almustafa: ⚠️ البارحة جنت بالـ "جم"، وبوسط صوت الحديد وهوسة التمرين ، لفت انتباهي شاب مخلي موبايله يم موبايلي عالرف. من ردت اخذ موبايلي انتبهت على شاشة موبايله مشتغلة ، وبحكم العادة والمكان ، كلت أكيد هسه يسمع راب أجنبي أو أغاني مال "تحفيز" وهوسة . بس الصدمة جانت .. الشاشة مشتغلة على " الزيارة الجامعة الكبيرة " ! بهاي اللحظة، هذا الولد كبر بعيني كلش، وتغيرت نظرتي اله 180 درجة . هذا الموقف مو مجرد صدفة ، هذا تأكيد لشي دالاحظه بوضوح بالفترة الأخيرة : الناس بدت تمل وتجزع من " تفاهة الاغاني ". إذا تركزون شوية بالستوريات، بالريلز ، وحتى بالإعلانات التجارية، راح تشوفون أكو انسحاب تدريجي من الأغاني الصاخبة، وبدوا الناس يبدلوها بمقاطع من قصائد بيها معنى او أدعية بصوت روحاني قبل سنة و سنتين بس ، جانت الطشّة للأغاني و الهوسة ، بس اليوم، تحس أكو "صحوة" عند الناس . الشباب، اللي جانوا ينهزمون من الواقع للأغاني، بدوا يستوعبون إن الروح تحتاج غذاء حقيقي ، و الطمأنينة و الروحانية اللي تلگاها بدعاء مثل " كميل ، الجامعة ، الندبة " أو قصيدة ثگيلة ، ما تعوضها ألف أغنية ما تترك بداخلك غير الفراغ والدوخة. فتقينت احنا نعيش مرحلة "نضج" ، وعودة حلوة للأصل . الشباب اليوم أوعى مما نتخيل . إنتو هم لاحظتوا هذا التغيير؟ لو بس أني؟ #ليث_المصطفى

ليث المصطفى | Laith Al Mustafa

Open In TikTok:

Region: IQ

Thursday 01 January 2026 14:38:48 GMT