@d_f434: اليوم طلعت التلفزيون الازرك مالتنه برا كبال البناية الي قريبه على البيت ورحت للي يبيع أقراص ليزيريه اشتري فيلم منه. ولما التفتت مالكيت التلفزيون وحرت شراح اكول لأهلي اذا سئلوني عليه، بقيت صافن وحاير اخر شي رحت اشتريت ساعة كاسيو لون اسود وبعدها رحت لبيت جيرانه ام رنده اكلت فاكهة من حديقتهم بس اني جنت اتمنى لو اكدر اكل ام رنده نفسها بس بناتها بالبيت. بعدها طبعا فزيت وطلع هذا الخرط كله الحلم مال نومة الظهر، سويت جاي شربت كوب، كلت لضحا عوفي المواعين اني اغسلهن حتى اكدر اركز لان دايخ، وغسل المواعين واحد من الاشياء الي يطرد الوساوس والقلق من راسي. الصبح من طلعت للشغل اشتريت ارخص فئة بساعات كاسيو، وهاي تقريبا على مااذكرها جان يلبس مثلها طالب ويانه اسمه عمر فاروق، وعمر فاروق سوه أكبر مصيبة بفترة الابتدائية، طالب غريب كلش لان اطول من عدنه وشواربه مال بعثي مو طفل بالابتدائية، شقاه ثكيل مايفرق هواي عن دمه. اني لحكت على المدراس المختلطة، وجنت ويانه سرى طالبه تشبه الملاك، مره ابوها اجه للمدرسة ولابس زي زيتوني وصاير عصبي بس من هذا العصبي الي يصير هيبه ومخيف، طلع اكو واحد من الطلاب كاتبلها احبج بقلم احمر ماجك، لمن فتشو الطلاب لكو قلم احمر يم عمر ودزو على ولي امره وصارت هوسه وبعدها انفصلت المدرسة ذكور واناث وراحت سرى ام كصيبة الشكرة والعيون العسلية. مره اجاني بوحده من الفرص وكلي ضياء احزرك حزورة؟ صفنت عليه كتله يله وأمري لله شسوي مجبر الله باليني بيك. كلي انت رياضي لو فني؟ جنت متوقع الاجابه سخيفه وطايح حظها، كتله رياضي! ضحك ضحكها سخيفة جان يكلي تعال العب بغراضي. رجع مره لخ بنفس الفرصة كلي نفس السؤال، كتله يله هي خربانه، جان يكلي انت رياضي لو فني كتله فني كال تعال العب بذني. حمدت الله على نعمة العقل واستغفرت الله على مابلاني وانا لله وانا اليه راجعون. ها صدك نسيت اكلكم الي كتب كلمة احبج باقلم اني مو عمر، من صارت الفرصة اخذت القلم من عنده ورجعته للجنطة مالته وماحجيت السالفة وهسه اعترفلكم بعد ٣١ سنة.

To see more videos from user @d_f434, please go to the Tikwm homepage.