Seenaa Gooticha Oromoo: #_Musxafaa_Huseen Musxafaa Huseen, goota Oromoo seenaa keessatti maqaa hin haqamne keessaa tokko, bara 1985 A.L.H Godina Arsii, Aanaa Zuwaay Dugdaa, magaalaa Ogolchoo ykn Haburaa, ganda Sanbaroo jedhamutti dhalate. Abbaa isaa Obbo Huseen Buttujjii fi haadha isaa Aaddee Saafayee Nuuraa irraa dhalate. Dargagummaa isaa irraa kaasee hanga humni isaa dandeettii isaatti maatii isaa gargaaruun beekama. Musxafaan barnoota sadarkaa jalqabaa mana barnoota ganda isaanii “Zuwayi Minci” jedhamutti jalqabe. Qabxii gaarii galmeessuun kutaa jahaatti barnoota isaa xumuree, itti aansuun gara godina Shawaa Bahaa, magaalaa Baatuutti imaluun kutaa torbaa fi saddeet M/B “Adventist” jedhamutti itti fufe. Yeroo barnoota kutaa 8ffaa keessa turetti mallattoo Oromummaa uffata isaa irratti barreessuun hiriira tokkoof mallattoo fakkaatee, barsiisota fi bulchiinsa barnootatti waamame. Barsiisaanis, “Uffata kana jijjiiri, mallattoo kana haqi” jechuun isa gaafatan. Musxafaan garuu ofii isaatti: “Ani eenyummaa, aadaa fi seenaa saba kiyyaa ifa godhee mul’isa malee, nyaata ykn dhugaatii miti kan garatti baadhuuf!” jechuun deebii jajjabaa kenne. Kunis hamilee isaa keessatti qabsoo sabaa jabeesse. Barnoota isaa kutaa 10ffaa bara 2005 A.L.H xumuruun booda, Musxafaan leenjii poolisii seene. Leenjii isaa dandeettii addaa fi murannoo olaanaan xumuruun, hojii humna nageenyaa poolisii Oromiyaa keessatti ramadame. Godinaalee Oromiyaa hedduutti tajaajiluun lubbuu lammiilee hedduu baraaraa, kabajaa fi galata hawaasa argate. Yeroo Fincila Xumura Gabrummaa (FXG) saba Oromoo guutuu Oromiyaa keessatti finiinee turetti, Musxafaan murannoo fi jaalala saba isaatiif ibsa ifa ta’e agarsiise. “Yoo ani jiru saba kiyya duratti Agaaziin lubbuu hin balleessu” jechuun qawwee isaa diinatti garagalche. Humna Agaazii 5 hanga 6 irratti injifannoo galmeessuun, poolisoota Oromoo fi humna waraanaa Oromoo jajjabeessuun fakkeenya ta’e. Gootichi kun dhuma irratti, Godina Arsii Lixaa, magaalaa Ajjeetti, Gurraandhala 07/2008 A.L.H wareegama qaalii lubbuu isaa saba Oromoof kenne. Musxafaa Huseen eenyummaa, aadaa fi seenaa saba isaa tikfachuuf murannoo jabaan qabsoo jalqabee, wareegama lubbuu isaatiin gootummaa ofii mirkaneesse. Inni seenaa gootota Oromoo keessatti bakka ol’aanaa qaba. 👉 Musxafaa Huseen — Goota Oromoo kaleessaa, fakkeenya eenyummaa fi wareegama sabboonummaa. Design: Arsii Muuneessaa - @dej.tube