@nationalmuseumkz: 22 қаңтар күні Мажарстанның Ұлттық музейінде ғұндар тарихы мен аңызға айналған қолбасшы Аттиланың мұрасына арналған «Аттила. Жад көкжиектері» атты халықаралық көрменің салтанатты ашылуы өтті. Ауқымды мәдени-тарихи жобаға әлемнің он екі елінен 64 музей мен ғылыми мекеме қатысуда. Олардың қатарында Қазақстан Республикасының Ұлттық музейімен бірге Лувр Абу-Даби, сондай-ақ Венгрия, Әзербайжан, Өзбекстан, Түркия, Ұлыбритания, Франция, Германия, Италия, Румыния және Словакияның жетекші музейлері мен ғылыми орталықтары бар. Көрменің салтанатты ашылу рәсіміне Қазақстан Республикасының Ұлттық музейінің директоры Берік Әбдіғалиұлы арнайы қатысып, жобаның тарихи маңызы мен өміршеңдігін атап өтті. Сонымен қатар ол халықаралық әріптестерге сәттілік тілеп, бірлескен ғылыми-мәдени ынтымақтастықтың маңызын ерекше атап көрсетті. Бұдан бөлек, Мажарстан Ұлттық музейі архивтерінің президенті Габор Жигмонд, Мажарстан Премьер-министрі бағдарламалық кеңсесінің басшысы, мемлекеттік хатшы Янош Надь қатысып, құттықтау сөз сөйледі. Ал Венгрияның «Тұран» қорының президенті Андраш Биро көрменің ғылым мен мәдениеттің бірлігінің символына айналғанын атап өтіп, түркі халықтарына алғысын білдіріп, Аттила мұрасының ортақ тарихи құндылық болып қала беретінін айтты: «Біз ғылым мен мәдениетті тоғыстыра отырып, бірегей көрме жасай алдық. Аттила — жай ғана тарихи тұлға емес, ол — ортақ жадымыздың ажырамас бөлігі. Біреулер үшін ол варвар болуы мүмкін, ал біз, мажарлар үшін — ата-бабамыз, аңыздарымыздың кейіпкері әрі көрнекті стратег. Біз түркі халықтарының бауырластығын жоғары бағалаймыз және бұл жобаға үлес қосқан қазақ, өзбек және басқа да халықтарға шынайы алғысымызды білдіреміз. Бұл көрме — бәрімізге ортақ мақтаныш. Музейлер мен тиісті мекемелердің қолдауының арқасында әлемдік мәдени мұраны дәріптейтін ауқымды халықаралық жоба жүзеге асты», — деді ол. Қазақстан аталмыш көрмеге ғұн дәуірінің тарихын, олардың Еуразия кеңістігіндегі орнын айқындайтын бірегей жәдігерлерді ұсынды. Бұл Еуропада осы атаумен ұйымдастырылып отырған ең ауқымды көрмелердің бірі болып саналады. Экспозицияның алғашқы бөлімі Аттиланың тұлғасы мен ғұн мемлекетінің тарихын қазіргі тарихи және археологиялық зерттеулер нәтижесі арқылы таныстырса, екінші бөлімде Аттила бейнесі төңірегінде 1600 жылдан астам уақыт бойы қалыптасып, ұрпақтан-ұрпаққа жеткен бай мифологиялық дәстүрдің эволюциясы паш етіледі.

591

There are no more comments for this video.

To see more videos from user @nationalmuseumkz, please go to the Tikwm homepage.