هەندێک جار ژیان ناچارمان دەکات لەو کەسانە کۆچ بکەین کە هەموو شتێکمان پێ بەخشین، نەک لەبەر ئەوەی ڕقمان لێیان بێت، بەڵکو لەبەر ئەوەی دواجار تێگەیشتین مانەوەمان لەگەڵیان تەنها سووکایەتیکردنە بە کەرامەتی خۆمان. ئێمە بە پاکی و بە دڵێکی سپییەوە هاتین، ویستمان جیهان و مرۆڤەکان بە جوانی ببینین، بەڵام بێوەفایی ئەوان فێری کردین کە میهرەبانی بۆ هەموو کەس نابێت و چاکەکردن لە شوێنی هەڵەدا تەنها هەراجکردنی شکۆی خۆمانە. سەیرە کاتێک بێ سنوور بەخشندە دەبیت، وادەزانن ئەرکتە، کاتێک بێدەنگ دەبیت، وادەزانن بێدەسەڵاتیت و کاتێکیش دەبووریت، وادەزانن ترسنۆکیت، بەڵام ڕاستییەکە ئەوەیە کە ئێمە تەنها ویستمان "مرۆڤ" بین لە جیهانێکدا کە زۆر کەس تێیدا تەنها زمانی بەرژەوەندی دەزانن. لەمەودوا مێزی یارییەکە دەگۆڕێت؛ ڕێز و وەفا تەنها بۆ ئەو کەسانەیە کە قەدرزانن، و بێدەنگی و کۆچی ئەبەدیش دەبێتە وەڵاممان بۆ هەموو ئەو پەیوەندییە ژەهراوییانەی کە تەنها ڕۆحمان دەخۆن. ئێمە دڵمان ڕەش نابێت، بەڵام فێر دەبین کێ لە چ شوێنێک دابنێین و چۆن دیوارێک لە دەوری سادەیی خۆمان بکێشین. هەر کەسێک فێری نەکردبێت چۆن حورمەت لە بوونی ئێمە بگرێت، کاتی ئەوەیە فێری بکەین چۆن تامی نەمانی ئێمە بکات، چونکە غیابی ئێمە باشترین و بەهێزترین وەڵامە بۆ هەموو ئەو جارانەی کە هەبووین و نەیانبینی. ئێمە ناگۆڕێین، تەنها شوێنی خۆمان دەگۆڕین، لە دڵی خەڵکە ناپاکەکانەوە بۆ ناو شکۆی تاقانەی خۆمان، چونکە سادەیی و پاکیمان گەوهەرێکە تەنها شایستەی ئەو کەسانەیە کە وەک خۆمان مرۆڤایەتی لە ناخیاندا زیندووە. - @shwan_ikurd