@coolman_100_100: #बुर्किना फासोमा सैन्य सरकारका प्रमुख इब्राहिम ट्राओरेले सबै राजनीतिक दल विघटन गर्ने निर्णय गर्दै दलका सम्पूर्ण सम्पत्ति राज्यको नियन्त्रणमा लिने आदेश जारी गरेका छन्। यस कदमलाई अन्तर्राष्ट्रिय सञ्चार माध्यमहरूले देशको राजनीतिक इतिहासमै सबैभन्दा कठोर र विवादास्पद निर्णयका रूपमा व्याख्या गरेका छन्। सैन्य सरकारले राजनीतिक दलहरूको अत्यधिक संख्याले दुरुपयोग बढाएको, नागरिकहरूबीच विभाजन सिर्जना गरेको र सामाजिक संरचनालाई कमजोर बनाएको दाबी गर्दै दलहरूलाई पूर्ण रूपमा विघटन गरिएको जनाएको छ। यसअघि राजनीतिक दललाई सार्वजनिक कार्यक्रम आयोजना गर्न रोक लगाइए पनि आन्तरिक गतिविधि सञ्चालन गर्न दिइएको थियो। तर नयाँ आदेशसँगै सार्वजनिक र आन्तरिक दुवै प्रकारका सबै राजनीतिक गतिविधि पूर्ण रूपमा प्रतिबन्धित गरिएको छ। नयाँ व्यवस्थाअन्तर्गत विघटित दलहरूको सम्पूर्ण सम्पत्ति राज्यमा हस्तान्तरण गरिनेछ। यसका साथै पार्टीसम्बन्धी कानुन, राजनीतिक कोषका नियमहरू र विपक्षी नेताको औपचारिक पद नै हटाउने प्रस्ताव समेटिएको विधेयक पनि अघि बढाइएको छ। यसले संगठित विपक्षी राजनीति समाप्त पार्ने दिशामा सैन्य सरकार अघि बढेको स्पष्ट सङ्केत गरेको छ। क्याप्टेन इब्राहिम ट्राओरेको नेतृत्वमा २०२२ मा सत्ता कब्जा भएपछि बुर्किना फासोमा असहमति र राजनीतिक स्वतन्त्रतामाथि निरन्तर दबाब बढ्दै आएको छ। सैन्य विद्रोहअघि देशमा १०० भन्दा बढी दर्ता भएका राजनीतिक दल थिए, जसमध्ये १५ दलले २०२० को निर्वाचनपछि संसदमा प्रतिनिधित्व गरेका थिए। अहिले ती सबै दल कानुनी रूपमा समाप्त गरिएका छन्। पश्चिम अफ्रिकामा अवस्थित बुर्किना फासो लामो समयदेखि गम्भीर सुरक्षा संकटको सामना गरिरहेको छ। विशेषगरी उत्तरी र पूर्वी क्षेत्रमा सक्रिय जिहादी समूहहरूको हिंसाका कारण हजारौँ नागरिकको ज्यान गएको छ भने लाखौँ विस्थापित भएका छन्। यही सुरक्षा चुनौतीको बहानामा सेनाले पटक–पटक राजनीतिक हस्तक्षेप गर्दै आएको छ, जसको परिणामस्वरूप पछिल्ला वर्षहरूमा दुई पटक सैन्य विद्रोह भएका छन्। इब्राहिम ट्राओरेको सत्ता आरोहण आफैंमा नाटकीय मानिन्छ। २०२२ जनवरीमा लेफ्टिनेन्ट कर्नल पल हेनरी सान्डाओगो डामिबाले तत्कालीन राष्ट्रपति रोच मार्क क्रिश्चियन काबोरेलाई कू मार्फत अपदस्थ गर्दा ट्राओरेले त्यसलाई समर्थन गरेका थिए। तर डामिबा सरकारले जिहादी विद्रोह नियन्त्रण गर्न नसकेको, सैनिकहरूलाई उचित सुविधा नदिएको र जनअसन्तुष्टि बढ्दै गएको आरोप लागेपछि ट्राओरे स्वयं असन्तुष्ट सैनिक अधिकारीहरूको नेतृत्व गर्दै सेप्टेम्बर ३०, २०२२ मा अर्को कू मार्फत सत्तामा उभिएका थिए। त्यस क्रममा कर्फ्यू लगाइयो, सबै राजनीतिक र नागरिक समाजका गतिविधि निलम्बन गरिए, हवाई तथा स्थल सीमाहरू बन्द गरिए। जिहादीविरुद्धको लडाइँमा सैन्य अनुभव भएको नेताका रूपमा ट्राओरेले सैनिक र सर्वसाधारण दुवैको समर्थन जुटाउन सफल भए, जसले उनको सत्ता कब्जालाई आंशिक वैधता दिएको विश्लेषण गरिन्छ। तर पछिल्लो निर्णयले बुर्किना फासो पूर्ण रूपमा सैन्य नियन्त्रणतर्फ धकेलिएको भन्दै मानव अधिकारकर्मी र अन्तर्राष्ट्रिय समुदायले चिन्ता व्यक्त गर्न थालेका छन्। राजनीतिक दल विघटन र सम्पत्ति राज्यमा लैजाने कदमलाई धेरैले ‘उल्टो बुद्धि’को संज्ञा दिँदै यसले दीर्घकालीन रूपमा देशको स्थिरता, लोकतान्त्रिक भविष्य र सामाजिक एकतालाई गम्भीर क्षति पुर्‍याउने चेतावनी दिएका छन्।

COOL म्यान😀😎

Open In TikTok:

Region: NP

Saturday 31 January 2026 05:52:02 GMT