@coolman_100_100: #युक्रेनी राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनसँग मस्कोमा वार्ता गर्ने क्रेमलिनको प्रस्ताव अस्वीकार गर्दै पुटिनलाई कीभ आउन खुला चुनौती दिएका छन्। जेलेन्स्कीले “म त उनलाई कीभ आउन निम्त्याउन सक्छु, यदि साहस छ भने आउन्,” भन्दै मस्कोमा वार्ता गर्नुपर्ने बाध्यता नरहेको स्पष्ट पारे। यो प्रतिक्रिया क्रेमलिनका वरिष्ठ सहयोगी युरी उशाकोभले युक्रेन–रुस युद्ध अन्त्यका लागि पुटिनसँग वार्ता गर्न जेलेन्स्की मस्को आए उनको सुरक्षाको पूर्ण ग्यारेन्टी गर्न रुस तयार रहेको बताएपछि आएको हो। उशाकोभले मस्कोमा भेटघाटका लागि आवश्यक सबै कार्यगत अवस्था उपलब्ध गराइने दाबी गरेका थिए। तर जेलेन्स्कीले उक्त प्रस्ताव अस्वीकार गर्दै युद्ध अन्त्यका लागि आफू गम्भीर भए पनि वार्ताको स्थान कुनै पनि हुन सक्ने बताए। उनले नेताहरूबीच प्रत्यक्ष भेटघाट आवश्यक रहेको उल्लेख गर्दै पुटिन प्रत्यक्ष वार्ताबाट जानीजानी टाढा बसिरहेको आरोप लगाए। रुसले सन् २०२२ फेब्रुअरीमा युक्रेनमाथि पूर्ण आक्रमण सुरु गरेयता यी दुई नेताबीच प्रत्यक्ष भेट भएको छैन। यसअघि पनि जेलेन्स्कीले टर्कीको इस्तानबुलमा प्रत्यक्ष वार्ता प्रस्ताव गरेका थिए, तर पुटिनले त्यसलाई अस्वीकार गर्दै मस्को आउन आग्रह गरेका थिए, जुन प्रस्ताव जेलेन्स्कीले अस्वीकार गरेका थिए। यसैबीच जेलेन्स्कीले ऊर्जा संरचनामाथि आक्रमण रोक्ने विषयमा आएका समाचारबारे पनि प्रतिक्रिया दिएका छन्। अमेरिकी राष्ट्रपति डोनाल्ड ट्रम्पको आग्रहमा रुसले केही दिनका लागि कीभमाथि हवाई आक्रमण रोक्न सहमति जनाएको भन्ने खबरलाई अस्वीकार गर्दै जेलेन्स्कीले कुनै औपचारिक युद्धविराम नभएको स्पष्ट पारे। उनले भने, ऊर्जा संरचनामाथि आक्रमण रोक्ने कुनै आधिकारिक सम्झौता भएको छैन, तर यदि रुसले आक्रमण रोके कीभ पनि त्यसअनुसार कदम चाल्न तयार रहेको छ। पछिल्ला हप्ताहरूमा रुसी आक्रमणका कारण कीभका विद्युत् र ताप प्रणालीमा गम्भीर क्षति पुगेको छ, जसका कारण अत्यधिक चिसोमा पनि सयौं हजार नागरिक दिनौंसम्म ताप सुविधा बिना बस्न बाध्य भएका छन्। जेलेन्स्कीले युद्ध अन्त्यका लागि कूटनीतिक प्रयास निरन्तर जारी रहने तर युक्रेनको सार्वभौमसत्ता र सुरक्षामा कुनै सम्झौता नहुने स्पष्ट पारेका छन्।

COOL म्यान😀😎

Open In TikTok:

Region: NP

Monday 02 February 2026 05:31:32 GMT