@karakiya_ms: Маңғыстауда Конституциялық реформа жобасы талқыланды. Маңғыстау облысында Конституциялық реформа жөніндегі комиссия мүшелері - облыстық мәслихат төрағасы Жаңбырбай Матаев пен облыстық қоғамдық кеңес төрағасы Бекмұрат Жүсіпов төрағалық етуімен жиын өтті, деп хабарлайды Қоғамдық коммуникация орталығы. Жиынға Маңғыстау облыстық мәслихатының депутаттары, Ақтау қалалық және Мұнайлы аудандық мәслихаттарының депутаттары, сондай-ақ облыстық қоғамдық кеңес мүшелері қатысты. Кездесу барысында Жаңа Конституция жобасына енгізілген өзгерістер мен толықтырулар кеңінен түсіндірілді. Негізгі жаңашылдықтардың қатарында бір палаталы парламент құру, Құрылтайдың өкілеттігі мен ауқымын кеңейту, вице-президент қызметін енгізу, 126 мүшеден тұратын Халық кеңесін қалыптастыру, адвокаттардың құқықтық мәртебесін айқындау, дін мен мемлекет арасындағы аражікті нақтылау мәселелері атап өтілді. Сонымен қатар «Әділетті Қазақстан», заң мен тәртіп, қоршаған ортаны қорғау қағидаттарын Конституция деңгейінде бекіту ұсынылғаны айтылды. Құжатта білім, ғылым және инновацияны дамытуға басымдық беріліп, адам құқықтары мен бостандықтары басты құндылық ретінде айқындалатыны жеткізілді. Жиын барысында Жаңа Конституцияның әзірге жоба екені, түпкілікті шешім халықтың қолдауымен қабылданатыны аталып өтті. Азаматтар өз ұсыныстары мен өтініштерін eGov және e-Өтініш порталдары арқылы жолдай алады. Сондай-ақ, Маңғыстау облыстық қоғамдық кеңесінің төрағасы Бекмұрат Жүсіпов негізгі әрі ең ірі өзгерістердің бірі- парламенттік реформа екенін атап өтті. -Алдағы уақытта екі палаталы парламенттің орнына бір палаталы парламент - Құрылтай құрылатын болады. Бұған себеп - еліміздің унитарлы мемлекет болуы. Халықаралық тәжірибеге сүйенсек, унитарлы мемлекеттерде көбіне бір палаталы парламент жұмыс істейді. Құрылтайдың басты қызметі - заң шығару орталығы болу. Заңдар енді үш оқылымда қабылданады. Бірінші оқылымда - талқыланады, екінші оқылымда - пысықталады, үшінші оқылымда - қабылданады. Құрылтайға айрықша мәртебе беріліп отыр. Атап айтсақ, Президент әртүрлі лауазымдағы мемлекеттік қызметкерлерді тағайындау кезінде Құрылтайдың келісімін алады. Олардың қатарында Жоғарғы сот, Аудиторлық палата мүшелері және басқа да маңызды лауазымды тұлғалар бар. Сонымен қатар, жаңа институт - вице-президент лауазымы енгізілуде. Вице-президент Құрылтайдың келісімімен ғана тағайындалады. Бұдан бөлек, Халық кеңесі институты да енгізіледі. Бұл халықтың билікке араласуына, мемлекетті басқару ісіне өз ұсыныстарын білдіруіне мүмкіндік беретін маңызды жаңалық деп есептеледі. Осы өзгерістердің нәтижесінде еліміздің Конституциясы іс жүзінде жаңа Конституцияға айналып отыр. Себебі Конституцияға 84 пайыздан астам өзгеріс енгізілген. Егер бұл өзгерістер референдум арқылы қабылданса, ол жаңа Конституция болып саналып, қабылданған күн Конституция күні ретінде белгіленеді, - деді Бекмұрат Жүсіпов. Кездесу қорытындысында қатысушылар пікір алмасып, бірқатар ұсыныстарын ортаға салды.

There are no more comments for this video.

To see more videos from user @karakiya_ms, please go to the Tikwm homepage.