@alseefhbebalarake: :شاعر تحت المجهر واقف لوحده، كأن الدنيا كلها دايرة عليه. مو لأنه معروف، ولا لأن الأضواء تحبه بس لأنه عيونه شايلة وجع وحكاية ما تنسكت. الناس تصافنه… تسأل بدون كلام: منو إنت؟ ومن وين جيت؟ ابتسم وقال بهدوء: أنا جيت من فلسطين. من أرض تعرف الدم مثل ما تعرف المطر، ومن حجارة تحفظ الأسماء أكثر من الذاكرة. كبر وهو يشوف القلاع تتحول رماد، والوديان تمتلئ حكايات ما انقالت. تعلم من الأرض يكون صلب، ومن الليل ما يخاف الظلمة. مو أقوى من غيره، بس رافض ينكسر. مو شاعر لأن الكلام مدلّل عنده، ولا لأن صوته عالي، بس شاعر لأن الصمت يوجعه، ولأن الكلمة عنده سيف، إذا نطق… يجرح الخوف. وقف تحت المجهر سنين طويلة، ينقاس، ينحكم عليه، بس ظهره ما انحنى إلا لله. طريقه كان شوك، وخطوته نار، بس عمره ما رجع خطوة ورا. طلع من حارة تعبانة، من بيت طين وسقف صبر، من أم تودّع ولدها كل صباح وما تدري يرجع لو لا. تخبّي دمعتها، وتزرع بقلبه أمل أكبر من العمر. رايته ظلت مرفوعة، حتى لو ثگلت السما عليه. كان يغنّي للصبح وهو بعده عالق بآخر الليل، يشعل نهار من قلب العتمة. مو حكاية تتنسى، ولا صورة تمر بالذاكرة، كان وعد… وإذا خان الصوت، صار هو الصوت. يمشي والليل يسمعه، يشوف طرق مظلمة ويزرع بيها شجاعة. لا جدار يوقفه، ولا ريح تكسره، لأن الحلم اللي داخله ما يموت. الأرض سألته: ليش واقف؟ رد عليها بدون تردد: لأني جزء منك، ولأني شايل وجعك، ولأني أريدك حرّة. حتى لو غابت الشمس عن وجهيه، والظلمة لفّت المكان، ظل ضو، ظل صرخة تطلع للسماء. حاولوا يمسكونه، يضيقون عليه، بس كان يطير بين العواصف، يكتب حكاية الأرض ويزرع الحرية بين أنفاس الناس. أمه علمته يزرع الأمل بين الدموع، وأخوه علمه الصبر، وأرضه علمته إن الحرية مو كلمة… هي دم يوجع وما يرضى بالخنوع. هو صوت الأطفال اللي صاروا شهداء، ودموع الأمهات اللي ما جفت، وصدى المدينة صار صرخة. وكل ما سكّروا باب، خلق باب جديد. وكل ما هدموا جسر، بنى طريق من الصبر. اسمه مو بس اسم، كان وعد. وكل حجر، كل نهر، كل وادٍ يعرف حكايته. هو فلسطين… صمود يمشي على رجليه، وحلم، مهما طال الليل، ما يموت. السيف حبيب العراقي
