@nuktatanzania: Mbunge wa Viti Maalum, Nassirya Alia leo Februari 05, 2026, ameibua hoja bungeni kuhusu ufinyu wa wahudumu wa afya wenye uwezo wa kutafsiri lugha ya alama, hali inayowakwamisha watu wenye ulemavu wa kusikia kupata huduma bora za afya. Akichangia hoja ya hotuba ya mipango amesema changamoto hiyo inapelekea kutokuwepo kwa usiri wa kutosha kati ya mgonjwa na mhudumu wa afya, kwani wagonjwa hulazimika kutumia watu wa pembeni kama wakalimani, jambo linalokiuka haki yao ya faragha na usiri wa taarifa za kiafya. Ameisisitiza Serikali kuchukua hatua za makusudi kuongeza wahudumu wa afya wenye ujuzi wa lugha ya alama ili kuhakikisha watu wenye ulemavu wa kusikia wanapata huduma za afya kwa usawa, heshima na kwa kuzingatia maadili ya taaluma ya afya.