Mar kasta oo aan ku fiirsado, waxaan ka arkaa wax aanan qof kale ka arag Indhahaaga waxa ku jira deganaan aan qalbigayga ku dejiyo; codkaaga waxa ku jira rajadii aan u baahnaa; taabashadaada waxa ku jira dabacsanaan naftayda jilcisa. Xitaa aamuskaaga wuxuu leeyahay macne aanan erayo ku qeexi karin. Adigu waxaad noqotay buug dhan oo jacayl ah oo ila socda, bog kasta oo aan rogo wuxuu i tusaa sabab kale oo aan kuu jeclaado. Waxaan marar badan is weydiiyaa sababta aan sidaan kuu dareemayo, balse mar kasta oo aan isku dayo inaan hal sabab sheego, waxaa iisoo baxa kumanaan kale. Waa sida aan kuu jeclahay ma aha sabab qura, waa sababo badan oo aan la tirin karin. Waa sida aad u qososho, sida aad u fakaraysid, sida aad iigu kalsoon tahay iyo sida aad u ogtahay inaad i leedahay xitaa adigoo aamusan. Adigu ma tihid jacayl aan maanta doortay oo berri dhammaanaya adigu waxaad tahay jacayl ka gudbay maanta oo ku nool berri kasta oo imanaya. Waxaad tahay doorashadayda maalin kasta, waxaad tahay rajadayda aanan ka quusan karin, waxaad tahay qofka aan rabo inaan garabkiisa ku dhammeeysto nolol dhan oo aan ku wada qaybsanno farxad iyo murugo, guul iyo guuldarro, maalmo roobaad iyo maalmo qorrax lehba. Waxaan rabaa in aad ogaato in adiga la’aantaa ay maalmuhu u ekaan lahaayeen kuwo aan dhadhan lahayn. Waxaan rabaa in aad ogaato in farxaddayda ugu weyn aysan ahayn hadiyad ama hanti, balse ay tahay daqiiqadaha aan kula qaato. Waxaan rabaa in aad ogaato in jacaylka aan kuu hayo uusan ku xirnayn xaalad, fogaan, waqtiga, ama dhibaatooyinka dunida balse wuxuu ku xiran yahay adiga oo kaliya. Haddii ay dunidu madow noqoto, adiga ayaan ka helaa nal. Haddii ay naftaydu daasho, adiga ayaan ka helaa deganaan. Haddii ay murugo igu soo dhacdo, adiga ayaan ka helaa garab aan ku nasto. Waxaad tahay qofka aan ka doonayo inaan gacantiisa ku istaago oo aan la socdo ilaa waqtiga ugu dambeeysa ee noloshayda. Waxaan kuu ballan qaadayaa hal shay: inaan noqdo qofka mar walba kuu istaaga marka ay farxaddaadu dunida ka hoos dhacdo, inaan noqdo gacanta ku qabta marka aad daasho, inaan noqdo garabka aad ku nasato marka caalamku kaa ilduufsado, iyo inaan noqdo jacayl aan kaa tegin xitaa marka dunidu is beddesho❤️ - @omarrr411