@abeer_dweik: وانتي داخلة بنيّة غير شكل 🌙 ختمة مرتبة، قيام هادئ، وقت طويل مع القرآن، لحظات صفاء قبل الفجر… بس اللي صار؟ أطفال صاحيين، طلبات ما بتخلص، عصبية قبل المغرب، بيت بدو شغل، وطاقتك نازلة. هون بصير الاصطدام الحقيقي. مش بينك وبين رمضان… بين الصورة اللي رسمتيها براسك، وواقع أمومتك. كتير أمهات بفكروا إنو العبادة الحقيقية هي العزلة، السكون، الوقت الفاضي. بس تربويًا وروحيًا، في فهم أعمق: الأمومة نفسها عبادة ممتدة. تنظيمك لانفعالك وأنتِ صايمة. صبرك على نوبة غضب قبل الأذان. ابتسامتك رغم الإرهاق. كل مرة بتختاري تحتوي بدل ما تنفجري… هاي لحظة تزكية حقيقية. رمضان مش موسم مثالي. هو موسم كشف. بكشف سقف توقعاتك، وبكشف كمان وين محتاجة تعيدي تعريف العبادة. يمكن خطتك ما زبطت. بس يمكن ربنا كاتبلك نوع تاني من القرب… قرب من خلالهم، مش بعيد عنهم. راجعي نيتك الليلة. وخففي الحمل عن صدرك. وخلّي سؤالك يكون: كيف بدي أعبد الله من داخل دوري… مش خارجه
