@juzmedia: Атырау облысында ерлі-зайыптыларды өлтірген күдікті Индонезияда ұсталды 6 қаңтар күні Жангелдин ауылынан 66 жастағы Максот Қарабалин мен оның 64 жастағы жұбайы Нәсіп Өтешқалиеваның мәйіттері табылған болатын. Ерлі-зайыптыларды өлтірген күдікті Индонезияда ұсталды. Қазірт оны Қазақстанға депортациялау мәселесі қарастырылып жатыр. ҚР ІІМ қызметкерлері шетелдік әріптестермен өзара іс-қимыл нәтижесінде Индонезия Республикасының Ломбок аралындағы Сенару ауылында аса ауыр қылмыс жасады деп күдікке ілінген ер адамды ұстады. Онымен бірге бұған дейін хабар-ошарсыз кетті деп халықаралық іздеуге жарияланған бұрынғы жұбайы да анықталды. Бұл жөнінде ІІМ баспасөз қызметі хабарлады. «Тергеу деректеріне сәйкес, 2025 жылғы қараша айында Атырау облысы Жангелдин ауылында күдікті ұзаққа созылған тұрмыстық жанжал мен пайдакүнемдік ниет негізінде екі адамды қасақана өлтіруді алдын ала жоспарлап, жүзеге асырған. Қылмысты жасағаннан кейін ізін жасыру мақсатында мәйіттерді шаруашылық құрылысының астына көміп, қан іздерін жойған, сондай-ақ жәбірленушілердің мүлкі мен қаражатын иемденген. Қазіргі уақытта оларды Қазақстан Республикасына депортациялау мәселесі қарастырылып жатыр», - делінген құзырлы орган таратқан ақпаратта.
