नेकपा संयोजक पुष्पकमल दाहाल प्रचण्डले कांग्रेस–एमालेसँग सहकार्य सम्भव भएको बताएपछि सामाजिक सञ्जालमा चुनावी गठबन्धनको चर्चा तीव्र भइरहेको छ । यसै सन्दर्भमा लेखिका बिमला निरौलाले गठबन्धनप्रति तीव्र असन्तुष्टि व्यक्त गरेकी छन्। उनले सामाजिक सञ्जालमा लेख्दै गठबन्धनलाई “जनताको मताधिकारमाथिको ठाडो बलात्कार” को संज्ञा दिएकी छन्। उनका अनुसार अहिलेको गठबन्धन सिद्धान्त र विचारको सहकार्य नभई “खुल्लमखुल्ला म्याच फिक्सिङ” मा परिणत भएको छ। निरौलाले चुनावका बेला एकअर्कालाई भ्रष्ट र असफल भन्ने दलहरू नै सिट बाँडफाँडका लागि एक ठाउँमा बस्नु जनतामाथिको षड्यन्त्र भएको दाबी गरेकी छन्। “भागबण्डा मिल्यो, सत्ता मिल्यो, कमिसन मिल्यो—बस् गठबन्धन सफल! तर जनताको सपना र देशको भविष्य सम्झौतामा च्यातिन्छ । गठबन्धनले सरकार बनाउँछ,तर देश बिगार्छ।र देश बिग्रिएपछि सत्ता बाँच्दैन। गठबन्धन भनेको अब राजनीतिक असफलताको प्रमाण हो। गठबन्धन भनेको कालेकाले मिलेर खाउँ भाले भन्ने रणनीति हो,” उनले उल्लेख गरेकी छन्। उनको भनाइमा गठबन्धन इमान्दार कार्यकर्ता वा देशका लागि नभई राजनीतिक रूपमा कमजोर भइसकेका नेताहरूको ‘लाइफ सपोर्ट सिस्टम’ जस्तै बनेको छ। निरौलाले मतदातालाई “दास भएर बस्ने कि नागरिक भएर सोच्ने?” भन्ने प्रश्न गर्दै यसपटक चरित्र, विचार र इमान्दारिता रोज्न आह्वान गरेकी छन्। #hellosamaj #VoteForChange #YouthForChange - @aurahealer3